O Samoa o le atunuu sailimalo. E nōnō manuia mai aao o le Atua Silisiliese, O le viiga lea e siitia muamua i lona suafa Paia, auā o lona alofa tulai ma lana pule faasoifua ua tau ai lau o le faamoemoe.
O le tautua a le afioga a Faasavalu Semu Nuuamoa mai le alalafaga o Samata ma Fagafau i Savaii, ma si ona faletua ia Lusia Nuuamoa mai le alalafaga o Safotu i Salafai, lea na atoa i le Aso Sa na tuanai atu, aso 15 o Iulai le lua o tausaga o la tautuaina le paia ma le mamalu o Samoa i Melepone, e ala i fofoga taumafa faatau atu i lo la faleaiga o le Immaculata’s Pacific Flavors.
Na fai le AsoToonai ma aso faapitoa na faailogaina ai lenei tautua matavela, e ala i le pa‘ū faapitoa o tau o taumafataga eseese. Na maitauina e la tatou pepa le taupati atu o le mamalu o le atunuu e lagolagoina le auaunaga ma faailoa le agaga faafetai ona o lenei taimi umi ua mafai ona ausia e lenei tamaalii e tautua ai ma le agaga faaaloalo Samoa, e ui lava ina faigata le soifuaga.
Molimau ma saunoa nisi, e tele lava ina faamāmā avega le afioga a Faasavalu aemaise o le faletua ia Lusia i le tau o taumafataga.
O le fofoga taumafa mo Aso Sa ua felanulanuai atili ona o lea ua faavelaina ma le manufata e salani ai toonai i le mae‘a ai o sauniga tapuai.
Saunoa Faasavalu, o le tasi lenei o aso e tumutumu ai le mamalu faatau mo toonai, faapea foi Ekalesia e faatonu faapitoa mai taumafataga mo faamoemoe faa-Ekalesia.
Na saunoa Faasavalu, o le agaga faafetai ma le faamalo e fia molimoli i le paia ma le mamalu o Samoa i Melepone, ona o lo outou lagolago malosi ua mafai ai ona faaauau le tautua. Faafetai faaeaea, faafetai faatau, o lo outou finagalo fesoasoani ua fai lea ma faamalosiau i o matou agaga tautua.
Ia faamanuia le Atua ia te oe Samoa, maua nisi tausaga se tele e auauna ai mo oe, aemaise o le Atua ma lona finagalo. Faafetai, Faafetai tele lava.
