O se lipoti tele ua faalauiloa nei i le folasaga a Samoa na faatautaia i le fono o le feagaiga e taofia ai faiga faailoga tagata faasaga i tamaitai, lea na matauina ai e ui o le faafetai a le Komiti a Malo Aufaatasi o loo feagai ma le matauina o galuega a atunuu o le lalolagi i lenei feagaiga, ona o lea ua laalaa pea i luma Samoa i ana taumafaiga ina ia faamalosia lea feagaiga, ae o loo iai lava vaega o le soifuaga o Samoa o loo iai atugaluga o le Komiti ona o le manatu ua lē atoatoa ma faamalieina ai aiaiga o lenei feagaiga ua tele tausaga o saini lima Samoa ina ia faatino loa.
O le tamaitai Minisita Lagolago o le Matagaluega o Tina ma Tamaitai Atina‘e o Nuu ma Agafesootai, o ia foi lea o le Minisita Lagolago o le Matagaluega o le Soifua Maloloina na folasia le lipoti faaletausaga lona lima ma le lona ono a Samoa i lea fono tele ma faamautu ai le tele o suiga ua mafai ona faatautaia e Samoa i lenei vaitaimi, ina ia mautinoa le ave o le lagolago a le Malo i lenei feagaiga.
O suiga o le tulafono ma teuteuga o tulafono ua iai nei aemaise i le itu lea o le talanoaina o le siitia o le numera o tamaitai faipule o le Palemene, o se tasi lava lea o mataupu e laga pea e le Komiti lenei a Malo Aufaatasi ona o le manaoga ia maualuga se sao o tamaitai Samoa ma so latou leo i totonu o upufai o Malo.
O lea ua pasia le 10 pasene e pei ona talanoaina ai e le Palemene, ae ua lē ausia le 30% e pei ona iai le aiaiga o le faamalieina o le CEDAW.
Ma e ui i lea tulaga na ta‘ua e le Afioga Gatoloaifaana Amataga Alesana Gidlow, o se laasaga tāua tele lenei i le talafaasolopito o Samoa auā o le faato‘ā tele lava lea o ni numera o tamaitai i lea li‘o o taitaiga faalemalo.
Ta‘ua e Gatoloai o le itu tāua o le iai o se laa i luma, ma o Samoa e faatuatuai lava ona laasaga ae e mautinoa, ma o se itu tāua lea auā o le tulaga i le faaleaganuu lava ia ma lona sau ai, o tamaitai e iloa lona laalaa i luma i tofiga o o latou taitoalua e pei o le tulai mai o i latou e faaipoipo i matai ma i latou e faaipoipo i taulelea. O le tofiga o alii sa faapea ona faaeaina faatasi ai ma tamaitai.
O suiga ua feagai nei i le tutoatasi ai o tamaitai i o latou tofiga, ua vaaia i le toatele o tamaitai ua iai le manaoga e umia suafa matai.
O le maualuga o le numera o tamaitai ua umia tofi maualuluga o le Malo i ofisa ma faalapotopotoga, o le maualuga o le numera o tamaitai ua umia ma faatamoe a latou lava pisinisi. O le maualuga o le numera o tamaitai o lea ua vaaia le iai o le manaoga e ofi atu i faiga filifiliga faavaomalo.
O le isi tulaga na folasia e le tamaitai Minisita, o Samoa ua tofia nisi o matagaluega ina ia feagai tonu lava ma le unaia o puipuiga ma le saogalemu o tamaitai.
O lala o le Ofisa o Leoleo ua faamalosia ai le nofo filemu i totonu o aiga, lea ua feagai ma mataupu e faato‘ai atu i sauaga faasaga i tamaitai.
Ua iai foi faalapotopotoga tumaoti o loo agai i ai tagata mo se fesoasoani aemaise i tamaitai. Ua iai le faaiuga a le Malo ina ia suia le Komesina o Sulufaiga ma lona ofisa i le Komesina o Aiā Tatau Faaletagata ma o le a faapea ona lotea uma ai soo se faiga faailoga tagata faasaga i tamaitai.
Sa tele lava ina laga e sui o le Komiti a Malo Aufaatasi ina ua fesiligia sui usufono a Samoa, pe lē o malosi pea tu ma aganuu faa-Samoa e taotaomia ai le laalaa i luma o tamaitai ma a latou taumafaiga, ona o lea e maua atu i le lipoti e tusa ma le 60% o loo sili ai lava le numera o matai alii nai i lo matai tamaitai.
O loo iai pea afioaga e lē o faataga le fai o ni suafa matai o tamaitai ae ona pau lea o le auala e mafai faaletulafono ona tauva ai tamaitai i le Palota i tofi faipule.
E le gata i lea e le o iai ni fuainumera ua avatu i le komiti a Malo Aufaatasi ina ia manino ai le tulaga o iai sauaga faasaga i tamaitai. O loo maua foi le maualuga pea o le numera o teine o loo faamaamulu mai aoaoga i le va lea o aoga laiti ma kolisi maualuluga.
O loo toatele lava foi tamaitai aoga ua aafia i ma‘itaga lē manaomia i le laiti ai o o latou soifua.
Faaalia e le Komiti lenei a Malo Aufaatasi, e lē manao e aveese tu ma aganuu a atunuu taitasi ae o le tauanau ina ia mafai ona iai se auala e laalaa ai i luma i ni suiga e mafai ai ona faapea ua talia le tutu faatasi o tamaitai ma alii i tofiga nei e fai ai faaiuga tāua o soifua o tagata, o le aiā tatau a tamaitai le maua o avanoa tutusa ma alii ma ia mautinoa e leai nisi lava faiga faailoga lanu o faia faasaga i tamaitai.
O lea foi la sa iai le vaega o Faalapotopotoga Tumaoti mai i Samoa na finauina foi le moni ma le faamaoni o galuega a le malo o faatautaia nei faasaga i lenei maliega ma e ogatusa lo latou manatu ma le manatu o i latou o loo i le Komiti a Malo Aufaatasi, o lea ua iai suiga ua faia e Samoa ae e lē o atoatoa ma e lē lava e mafai ai ona faapea mai ua matuā faamalosia e Samoa le feagaiga.
O faamasinoga le isi tulaga na laga, ona o le fia iloa e le Komiti po ua faaaogā sa‘o le feagaiga lenei i le faatinoga o iuga fai faasaga i ē o loo sauaina tamaitai i soo se auala ma o loo ua iai le suiga tele i faasalaga ua ave ia i latou ua faia soo se sauaga i tamaitai peitai e lē o sau sa‘o ia faaiuga i lalo o le CEDAW ma ona aiaiga, ae o loo ta‘ua lava i le taimi e faia ai faaiuga a nisi o faamasino o le Faamasinoga i totonu o Samoa.