Ua atoa tino o Vaatausili auā ua toe sosoo le fau ma le fau. E le o toe po malaē i le failagi o le folauga i le susuga ia Su‘a Vasa Su‘a sa avea ma Tiakono Toeaina, ma avanoa ai le tofi e tasi i lea foi vaega o le galuega.
O le feagai ai o le Matagaluega EFKS a Kuiniselani ma le tofiga masani e pei ona faataunuuina i le Aso Toonai aso 7 o Iulai, na fefulisai faalaau mamafa ai finagalo i se palota na faia toto‘a. Na tasi moemoe ai le faafitiga o ‘aleaga ma maua ai le tasi.
O le tofi Tiakono Toeaina EFKS Matagaluega a Kuiniselani ua faapaleina ai le fetalaiga ia Ofoia Ofisa Lemamea (Uafato Fagaloa & Matautu Lefaga) ae o le faletua ia Apaula Lemamea e mai i le alalafaga o Malie.
Ua tauaveina nei e le fetalaiga ia Ofoia Ofisa Lemamea le tofi Tiakono Toeaina i le Matagaluega EFKS a Kuiniselani mo le lima tausaga.
O loo fai aulotu i laua i le Ekalesia EFKS South West Brisbane, lea o loo taitai ai le susuga i le Toeaina ia Rev Tauaaga ma le faletua ia Senerita Mataafa, faapea le uluai Toeaina na asaina le gasu o le taeao i Brisbane, le susuga ia Rev Samuelu ma le faletua ia Tima Tu‘iai o le Pulega a Saute.
Momoli atu faamanuiaga i lau fetalaiga Ofoia Ofisa ma le faletua ia Apaula Lemamea i le tulai mai le tofi. Ia agalelei le Atua ma foai le mau e tele ma le tamaoaiga auā le galuega fou ua faapaleina ai oulua.
