O polokalame o le vaiaso o le Teuila o lenei tausaga 2012, o le a silasila ma maimoa ai le atunuu mo le taimi muamua i le koneseti ta‘uta‘ua i Niu Sila ma isi atunuu o le lalolagi le Ragga Muffin o le a pepese ai ma faafiafia nisi o tagata lauiloa i le musika e le gata o le Pasefika ae o isi atunuu e mamao ese ma lenei faaitu o le lalolagi.
O le saunoaga lea mai le ofisa sinia o loo pulea le vaega o maketi a le Pulega o Tagata Tafafao le susuga Dwayne Bentley (silasila i le ata) ina ua fesootai i ai mo se faamatalaga i tapenaga o le Teuila o lenei tausaga.
“O le silasila a le komiti e tatau ona iai se suiga o polokalame aemaise lava o lea ua atoa i le tausaga nei le 22 tausaga o le Teuila Festival”, na saunoa mai ai le susuga Dwayne Bentley.
O lea ituaiga o koneseti e pei ona faaalia e le alii ofisa sinia e ta‘uta‘ua tele i atunuu i fafo e pei o Niu Sila ma e toatele tagata e fia maimoa i ai, ma o le isi lea mafuaaga o le tuu e le komiti i le polokalame o le vaiaso o le Teuila ina ia avea ma se tasi o tapenaga e unai mai ai tagata tafafao i fafo e malaga mai e maimoaina le Teuila.
“O le autū tonu lava lena o le Ragga Muffin auā e toatele lava tagata latou te silafia le koneseti lea, ma e le mafai ona lē malaga mai e maimoaina i Samoa”.
E lei mafai e Dwayne ona faailoa poo ai nisi o tagata talenia ma lauiloa i musika ma pesepesega o le a faafiafia ae o lana faamatalaga e toatele.
O le tasi o polokalame o loo talitonu le alii ofisa sinia o le a tumutumu ai le Teuila o lenei tausaga, o le Ragga Muffin mo tuuga vaaalo o le a tausinio ai auvaa alo mai le Pasefika ma Samoa.
O lana saunoaga mai o le tasi lea vaega o le polokalame o le a mautinoa foi le toatele o tagata eseese mai le Pasefika o le a malaga mai ai ma tumutumu ai le taulaga o Apia ia Setema.
O loo tumau lava isi polokalame masani, ae pei o polokalame fou ia ua faaofi e fai ma faatosina lelei mo tagata tafafao mai fafo e malaga ai i Samoa e maimoaina le Teuila o le 2012.
O tuuga fautasi, tauvaga o pese lotu, faapea le sailiga o se Tausala o Samoa, o polokalame masani lava ia e lolofi i ai le toatele ua masani i le Teuila e maimoa i ai.
O isi polokalame o faalauiloaina o oloa taulima ma isi oloa gaosi i le atunuu. O le gaseseina o taumafa Samoa eseese atoa ai ma taaloga.
O le upega tafailagi a le Pulega o Tagata Tafafao ua faalauiloa ai le polokalame o le Teuila o lenei tausaga peitai o loo iai ma le avanoa e mafai ai ona toe faia ni suiga i polokalame o loo faalauiloa ai.
O le tauvaga o le sailia o se Tausala o Samoa e tapunia i le Aso Tofi o le vaiaso nei, aso 19 o Iulai le lesitala, ma e faatoa iloa pe toafia ni tamaitai o le a faaulu suafa mo le tauvaga pe a tapuni le lesitala.
O le Teuila o le tausaga nei o le a lua a‘i tausaga e le toe tauva se tamaitai tausala Samoa mai Niu Sila, ina ua faaui ese e le Komiti o lea Tausala le tulaga tausinio o se tamaitai Samoa mai Niu Sila.