“E logo le tuli o le tata.” E lē o se mea fou le taumafai e fesoasoani i o tatou tagata Samoa ina ia tausisia le soifua maloloina. Peitai o loo maitauina le leai o se faaitiitia o le tulaga o faama‘i e alia‘e mai ona o le tele o le taumafa ae leai se faamalosi tino o maua.
O lea ua a‘e ai se tofa i le Pulega a le Radio Samoa e fesoasoani i le tele o polokalame soifua maloloina o loo tata logo atu ai Masefau i luga o le leitio ina ia maua e tagata Samoa le soifua maloloina.
O le vaiaso nei ua amataina ai ona faalauiloa le kalapu savali a le ‘Radio Samoa Walkers Club’, o se vaega o le visiona tele mo le polokalame a le Walking Samoans – Samoa Savavali, e pei ona faalauiloaina i taeao taitasi i luga o le Radio Samoa.
O le polokalame i luga o le leitio, o loo faatalatalanoaina ai ma fautua mai ai i latou o taitai o le atunuu aemaise le taumafai lea e faalauiloa le tele o tagata o loo toaaga e fai le savali, ma faailoa mai pitonuu, o aso ma taimi o loo savavali ai, e taumafai ina ia auai atu ai nisi ma amata ai ni a latou lava kalapu savavali ae faalauiloa i luga o le leitio.
O le agaga atoa o lenei polokalame, ia saili se auala e sili ona taugofie ma sili ona faigofie ona faatino e tagata Samoa uma, ae mafai ai ona faia faamalositino. Ua iloa, o le savali, o se tasi o faamalositino e sili ona faigofie ma naunau tagata uma e faatino, ae maua ai le faalusi o le tino puta, faagaioi ai le tino, faaalu ai le afu, ae atili olaola ai foi ma ala le mafaufau, o vaega uma nei e fesoasoani tele i le alofia o le tele o le mau faama‘i lē pipisi ua aafia ai le toatele, aemaise le gasegase o le ma‘i fatu.
Ua saunia e le Radio Samoa ni mitiafu ua lolomi faapitoa ai le ‘au‘au o lenei polokalame “Walking Samoans” ma e iai le faamoemoe, soo se tasi e lesitala patino mai lona suafa ina ia auai i lenei polokalame faagasolo a le Leitio, e mafai ona ia totogi le $15 mo lana lesitala ma maua atu ai lona mitiafu ua faailoga patino ai i latou o le a auai i lenei polokalame.
E talitonu le Radio Samoa, o le latou auaunaga e faasino tonu atu i le tautuaina o le mamalu o Samoa i soo se vaega e mafai, ua ono ma tatau ai ona latou tausolomua e unaia le tausia o se soifua maloloina lelei, e tauala atu i le latou taulogologo i le leitio ma le nusipepa, o auala sili ia ona fesootai uma i ai tagata Samoa.
O le sini o le polokalame ia uma le 12 masina talu ona amata lenei fuafuaga, ua ausia se to‘a 1000 pe sili atu ni tagata Samoa ua lesitala mai mo le Walking Samoans. Ma o le a iai foi nisi o sui o le komiuniti, i latou o loo avea ma faataitaiga lelei i le tausia o le soifua maloloina, ina ia faatalanoa i luga o le Leitio, e faasoa ai o latou finagalo ma ni fautuaga i ni auala e ausia ai lenei taulagalaga aogā.
O aso taitasi o le a pesepese atu ai lava le Radio Samoa i le leitio, mo auala ma taimi eseese e faatino ai le savaliga i pitonuu eseese o Aukilani aemaise o isi aai i fafo atu. O le a maua atu foi i luga o le Radio Samoa auala e tausia ai pea le soifua maloloina lelei.
Ua talisapaia e le Radio Samoa, le fesoasoani a isi foi faalapotopotoga faalesoifua maloloina e pei o le Pacific Heartbeat ma le Tala Pasifika i le vaega a le Heart Foundation i le soosootauau i lenei polokalame, tainane foi nisi o faalapotopotoga autū tau le soifua maloloina i Aukilani, sa galulue faatasi foi ma le Radio Samoa i le tele o tausaga ua tuanai, i polokalame lava nei tau le soifua maloloina.
I le taimi nei, ua amata ona faailauiloa i luga o le Radio Samoa, e le susuga i le faipule o Mangere Su‘a W Sio o loo ia taitaia le savaliga o taeao o Aso Toonai i luga o le mauga i Mangere, faapea le tamaitai pule o le Community Relations a le kamupani a le Mercury o Helen Amituanai, o latou savailiga o taeao o Aso Faraile i luga foi o le mauga o Mangere, i le 6 i le taeao.
O Aso Faraile o le a taitaia e le susuga Tavai Meni le savaliga a le aufaigaluega a le Radio Samoa, i le taimi o le lunch i le 11.30am mo le 30-40 minute, o le a faia lea i Aso Faraile taitasi amata mai le ofisa a le leitio. E foliga mai e malosi mai le itu a Mangere i le amata i mea lelei mo le soifua maloloina lelei o tagata.
Soo se tasi lava e fia auai i nei savaliga, o loo telē le avanoa, e savavali faatasi ai mo le faamalositino. O savaliga ia ua mautu mo le taimi nei, ae o le a faatali pea, mo le galulue faatasi ma le lautele, aemaise pe a tele nisi o le a lesitala mo le faamoemoe. E tele mea aogā o i latou o le a lesitala mo le manumaloina o faailoga, aemaise o polokalame tuufaatasi a kulupu savali eseese o loo fuafua ai le Radio Samoa i le lumanai. O le autū a savavali faatasi, e telē se aogā, ma se faalototele mo tatou tagata.
E maua atili nisi faamatalaga aemaise le lesitalaina o suafa mo le Walking Samoans, pe a fesootai mai i le ofisa o le Radio Samoa i le 09 2621593, poo le imeli: walkingsamoans@radiosamoa.co.nz
