Talofa lava,
O le ituaiga o le maukeni o le vaiaso lenei e igoa ia Musquee De Provence. O le Maukeni mai Falani. O le lanu o ona fua e amata i le lanu meamata ae a matua ua afu, ua lanu enaena malosi.
E mafiafia lona aano toe lanu moli malosi, e suamalie feololo lona tofo, e onomea i le kuka faa-chips. E ola malosi lona tupu ma salafalafa toe taupatupatu autafa o le fua, e oo le mamafa o fua i le 5 -15 kilokalama i le fua e tasi pe a matua.
E umi ona taatia, e tuai ona pala fua, e oo lava i le 6 – 8 masina o lelei e lei pala. O le “mamafa” e onomea ona tauva ai le ituaiga lea i le tauvaga. E matua i le 100 aso, ma ona fatu e manaia i le faavela e ‘ai pei o le pinati.
O le ituaiga lenei a faapea e te manao e faasao na o se fua e tasi pe lua foi o le laau atoa ae fati ese uma isi fua, e mafai ona faaaogā tumutumu o lala maukeni e falai ai mamoe poo le eleni foi.
Nisi faafitauli e aafia tele ai Fruit trees: E masani ona maua i le ‘atia o ogalaau o lala o fruit trees e pei o moli, tipolo poo apu foi. E te‘i a ua mamae ma magumagu se lala ae a tilotilo latalata i ai e iloa ai atiatiga ma pūpū i le lala lea ua pe. O le mafuaaga o le iniseti e ta‘ua o le Stemborer, e ulu i totonu o le ogalaau ona ‘ati lea o totonu o le ogalaau.
Faatoa iloa lava ina ua mamae se lala. E faigata ona fana i se vailaau auā o le iniseti o loo nofo i totonu o le ogalaau. Pau le togafiti e fai o le ‘ili ese atoa o le lala lea ua mamae ona ave lea e susunu i le afi ina ia pe ai le iniseti pei se afato la e i totonu o le ogalaau lea ua pe.
A ‘ili, faaaogā se ‘ili laupapa ona ‘ili lea faamatifa le tipi ina ia aua ne‘i to‘a le vai i luga o le nofoaga lea sa pipii ai le lala ua aveese. Avane se vaselini e nini ai le pito o le lala lea sa tipi ina ia aua ne‘i ulu i ai ni siama e atili ai ona magumagu le pito lea na tipi.
Soo se lala lava e tipi poo se ‘oti laau e faaaogā pe a teu laau, nini i le vaselini le pito lea sa iai le tipi; e faapena foi pe a teu le rosa.
O le vaitaimi foi lenei a o fua palamu, apu ma pea, ua tele manu felelei ua ‘aia fua. O le togafiti e faasegisegi ai manu, o le tatau faasolosolo o pepa iila i luga o lala o le laau ina ia lealea i le matagi i taimi uma ma pa‘ō e segisegi ai manu felelei. Faaaogā foil paper poo carry bags lea sa fafao atu ai le faatau i le faleoloa.
Manatua o le taimi lenei ua lē gata ina amata ona vevela le la, ae o le savili e vave tele ona mātū ai le palapala i Niu Sila nei. Toaga e fui laau i le taeao ma le afiafi. Avane ni laulaau mamago poo mutia ua mamago lelei e tanutanu ai autafa o le maukeni ina ia tuai ai ona mātū le palapala, e aogā e taofi ai le va i lalo ifo o le laau.
Talatalanoa i au laau pe pesepese foi i ai auā e iai foi gagana a laau, ma le tatalo mo oe ia e lima ola.
