E ui ina ua malolo le aulakapi liki a le Roosters le kalapu sa taalo ai Sonny Bill Williams i le taaloga ma le au a le Rabbitohs i le Aso Faraile o le faaiuga o le vaiaso, e lei avea lea ma ala e solomuli ai le fiafia ma le agaga faagaeetia o le alo o Samoa 29 tausaga, i lana kalapu i le lua tausaga ua tuanai o lana konekarate, e ui o lea ua faamavae aloaia atu i ai i lana taaloga mulimuli na se‘i mavae atu nei.
E le taumate o le a tele se misia o Williams e le Roosters, peitai pei ona ia ta‘ua i nisi o tusitusiga, e lē iloa lava fuafuaga, atonu e toe maua se isi avanoa mo le liki, pe a mae‘a le isi laasaga o ana taaloga mo le lakapi uni a Niu Sila, ma lana mau, e na o le Roosters lava le kalapu e toe taalo ai pe a toe maua se avanoa.
O le faamavae atu o Williams i le Aso Faraile, ua avea ma taa‘iga lelei mo lana kalapu, a o se ‘ai lelei mo le alo o Samoa, pei ona ia faamanino, i lana faaeaea ma le faafetai i le Chairman o le Roosters Nick Politis, ona o le avanoa auā o ia lea na mafua ai ona toe foi i le lakapi liki i le 2013.
Pei ona silafia o le faalua ai lea ona toe taliu Williams e taalo i le lakapi liki, talu mai ona savali ese, mai le kalapu a le Bulldogs i le tausaga e 2008 ae malaga sa‘o i Falani ma taalo ai mo le aulakapi iuni a Toulon.
A saili se talaaga o se tagata taalo lakapi e lelei i le lakapi liki, lelei i le lakapi iuni, toe siamupini i le aupaga mamafa i faipelega, o le susuga Sonny Bill Williams. Toatele foi tagata na faitioina le fealualuai o lenei alo ta‘uta‘ua o si o tatou atunuu, ua manatu nisi ia nofo i le iuni, aua le alu fua e fusu, peitai o le upu e masani ai, e lē falala fua le niu, e leai foi se mea e tupu fua e aunoa ma sona mafuaaga tatau.
O Williams o se tagata e lē fefe e faataunuu se moemitiga tusa pe faamata e faigata. Ana lē taunuu le fuafuaga e toe liliu i le lakapi liki i le 2013, e lē manumalo le Roosters i le Premiership, ma semanu foi na te lē mauaina le faailoga taualoa o le tagata taalo lakapi liki o le tausaga a le RLIF (Rugby League International Federation) i le faaiuga o le tausaga lava lea. Mai le 2009 seia oo i le 2013 na susue ane ai le isi itulau fou o le talaaga o Sonny ina ua faatepa Samoa ma le lalolagi i le isi taleni na natia, ma amata ai ona taalo fusu, toe tele foi tala a tagata.
Peitai ua atili aasa ai le malosi o le tama Samoa, ono fusuaga ono foi manumalo, ma o loo ia umia fusi o le aupaga mamafa NZPBA (New Zealand Professional Boxing Association) Heavyweight Champion ma le WBA (World Boxing Association) International Heavyweight Champion. Lea ua taliu mai e taalo mo le lakapi iuni a Niu Sila mo le isi lua tausaga ma sauni ai mo le fanau o lana pepe muamua lea e faamoemoe e ola si ona faletua ia Novema o le tausaga nei.
