Fai moliaga o se tamaitai leoleo

O le taavale a leoleo lea na u i luga tapilipili i se vaega o le alatele i Alamagoto i le faaiuga o le vaiaso na talimalo ai Samoa i le fono a atunuu laiti tauatiae, ua alu alu nei suesuega a leoleo ae maua mai le faamatalaga mai le Sui komesina le susuga Fauono Talalelei Tapu, o le a molia se tamaitai leoleo o loo masalomia o ia na aveina le taavale numera Pol-09.

O se taavale e mo le ofisa o leoleo i Tuanaimato lea na faavave atu i se valaau mo se fesoasoani i se aiga i Moamoa e pei ona faaalia e le Sui komesina. Peitai o loo iai nisi molimau e faapea e lē o se valaau na alu ai le taavale ae o le tamaitai leoleo na aveina sa agai i lo latou aiga mo se feau. E lē o mafai ona talanoa mai leoleo i lea molimau ae o le vaiaso nei o le a faia ai moliaga o le tamaitai leoleo e pei ona saunoa le Sui komesina o le Matagaluega o Leoleo ma Falepuipui.

O loo fai mai foi le Sui komesina e pei ona ia saunoa i nisi o tusitala o le faaletonu o le auala na mafua ai ona taavalevale le pikipau ma u i luga ona pa‘u ae saofai i le fale. O molimau e lei faamaonia o loo faaalia ai sa vaaia le taavale o tu i se faleoloa i Lalovaea ae agai se tasi o leoleo ma faatau ane ni fagupia.

O le taimi o le faalavelave na oo tonu atu ai se loli a le fuimu ma agai ane nisi o alii ofisa e fesoasoani lea e faapea na maua atu ai e se alii fuimu se taga pepa fagu pia i totonu o le taavale a leoleo ma aveesea loa.
O loo teena e le Sui komesina o se avamalosi na fesootai ma le faalavelave ae o le leaga o le auala. E lē o mafai ona faailoa e le Sui komesina le suafa o le tamaitai leoleo ona o lana saunoaga i le au faasalalau ma tusitala sei oo ina faia ma moliaga ma tulai i le faamasinoga.

O loo molimau mai foi nisi o leoleo o le lua ai lea o faalavelave tau taavale ua aafia ai lea tamaitai ofisa. O se tasi o faalavelave na aafia ai lava lana taavale ma e masalomia foi sa aafia ai le avamalosi. O le mae‘a o se inuga sa iai le tamaitai leoleo ma nisi o leoleo sinia, na ia agai ai i lo latou aiga ae tupu ai le faalavelave.

Ua fai si levaleva atu o nai masina talu ona tupu lea faalavelave, ae ua toe tulai mai le isi faalavelave lea o le a molia ai ma tulai i le faamasinoga. O le amataga o le vaiaso nei e tulai ai foi se isi leoleo o se alii e tali i moliaga o lona lē usitaia o le tulafono o le masini mānava e iloa ai le maualuga o le avamalosi na ia inumia.

O se inugapia foi a leoleo ina ua mānava mai galuega sa auai lea alii ofisa e pei ona faailoa e le Sui komesina. O lona agai i le fale na ia faaaogā ai se uilaafi a leoleo ae leai se faatagaga. Na tulai mai ai se faalavelave e pei ona sa tau taia ai se tamaititi i Vaiusu. Ua faamalolo lē tumau le alii leoleo e faatali le taunuuga o lona faamasinoga.
Alii ma tamaitai o Malu o le malo