Na sagisagi fiafia aiganalua, potopoto faatasi ana uo aemaise o nai ona mātua, uso ma tuafāfine, i le maota o faafiafiaga ma taumafataga, le Golden Pheasant, i le afiafi o le Aso Toonai na mavae atu e patipatia ma sii faatasi le viiga ma le faaneetaga i le Atua silisiliese, ona o tausaga e 21 ua foai mo le atalii, le uo, le tuagane. O Lino o le alo o Tanuvasa ma Mary Fuatino mai afioaga o Salelavalu ma Falealupo. Na saunoa faafeiloai Tanuvasa i le auvalaaulia ma saunia ai e le susuga a Too Tito le tatalo faamanuia mo le Aso Soifua, foai lana Ki ma saunoa faalaeiau ai nai ona mātua, ona tali lea o le sua ma faagasolo ai nai fiafia laiti i le DJ a Richard Tanuvasa.
A o lei tatala le filialii, na saunoa faalaeiau le susuga ia Sione Mahina ma tatalo faamatafi ai le aso. Matou te alolofa tele mo oe le atalii pele, foai e le Atua nisi tausaga se tele tatou te mafuta faatasi ai ma faia lona finagalo. Tumau lou fiafia i le lotu ma lou loto alofa, alofaaga mai ia Dad ma Mum, ou uso ma tuafāfine, ou cousins ma lou aiga atoa i Melepone ma Niu Sila.
