O se aso matagofie ma le lagilelei na potopoto ai aiga uma na autovaa mai Nu Sila, ma isi setete o Ausetalia ona o le faamanatuina o le 21 tausaga o le tamaitai o Lily Lemi. E ui i se agaga fiafia o le tamaitai faiaso fanau, ae o se tupua lē mautonu sa taumate pea i lona mafaufau i le motusia faafuasei o le la mafutaga ma si ona tamā lea na malaga i Samoa i le 3 tausaga talu ai ma maliu ai i se gasegase oso faafuasei. O si ona tuaa lea o Tunai Matāfai Sio mai Leauvaa ma si ona tina ia Momoemausu Oliana Lemi mai Taga i Savaii. Sa logomālie se upu timai mai lana auauna.
O le tofa ia Matāfai David Saena sa fai ma fofoga o le aso ae fai ma fofoga o aiga le fetalaiga ia Faletuai Onosai Saena na malaga mai Niu Sila auā le faaleoina o faaaloaloga i le paia o le aufaigaluega a le Atua ma le auvalaaulia lea sa vaaia i lea aso le matagofie. O le tofa ia Laupua sa fai ma fofoga o le ekalesia Everlasting Church Samoa i Forest Lake e momoli se agaga faafetai i tapenaga matagofie ma le valevale alofa o aiga i fanau. Na auai mai foi le susuga i le Toeaina ia Rev Faiumu Pio Faletuai ma le faletua ia Koleti mai Melepone faapea aunties ma uncles mai Niu Sila.
