Faamatala mai le tau vaovao o pagota o le falepuipui i Tafaigata i le vaiaso na faalauiloa ai le lisi o pagota sa mafai ona agai i tua i aiga auā faigamalologa o le Kerisimasi. O le lisi e to‘a 300 i latou na maua avanoa e fai malologa ai ma o latou aiga.
O le mau a le afioga Leiataua Aviga, le sui Komesina o Leoleo, o i latou ia na tatala i tua mo le Kerisimasi o tagata ua manatu le pulega o le Matagaluega o Leoleo ma le Falepuipui o le a usitaia tuutuuga ma aiaiga o palola mo pagota.
O tausaga taitasi e toatele lava pagota e maua le avanoa e fai malologa ai i aiga mo le palola o le Kerisimaasi ma e fua lava i le pagota o loo silasila atu le Pulega o loo usitai ma ua iai le salamō ma le suiga o le olaga talu ona taofia i le toese i Tafaigata.
O lea la na faia le lisi aumai i le Pulega ma faamautu ai loa i latou ua manatu le Pulega ua talafeagai le tatala i tua. O le tatala la i tua o le to‘a 300 na totoe ai le to‘a 200 e lei tatalaina i tua ma o iina tonu lava na tulai mai ai lea vevesi. O le feita tele o i latou e lei tatalaina i tua na misa ai ma paggota na taumafai e tapena i aiga i le Aso Lulu a o loma ai le Kerisimasi.
O le lē malilie lava o i latou na lē mafai ona agai i aiga mo le Kerisimasi, o le faamatalaga lea na maua mai i le sui sooupu o le Matagaluega o Leoleo i lea mataupu. Na fesiligia Fauono Talalelei Tapu pe moni faamatalaga faapea e toatolu leoleo na lavevea ai i le tau vaovaoga o le feeseeseaiga na tulai, ae faapea mai Fauono e lei oo i sea tulaga lea feeseeseaiga ua na o upu lava na lafo o le feita o pagota ua lē agai i tua.
O le lipoti o leoleo lavevea na logo mai e se tasi sa molimauina lea feeseeseaiga. E ui o lea na faapea foi ona maua lipoti faapea na toe valaau atu nisi o leoleo i le ofisa Tutotonu o le matagaluega o Leoleo i Apia ina ia fesoasoani e tau vaovao vevesi i Tafaigata i le taeao lea o le Aso Lulu a o lumanai le Kerisimasi.
Ona pau le faamatalaga na aumai i le afioga Fauono o le itu lea na toe faamalamalama lelei lava i pagota le lisi o le palola o le Kerisimasi o lenei tausaga ma mafuaaga ua maua ai e isi le faamanuiaga ae leai isi.
“Na fai lava foi ia i latou e lei mafai ona tatala i tua, a lelei lava le amio ona mafai lea ona toe vaavaai i le malologa o le vaiaso mo le Tausaga Fou pe mafai ona tatala ai i tua ae a lē lelei lava amio ma lē usitai i aiaiga e mafai ai ona tatala i tua, e leai lava la se avanoa e tatala ai i tua,” o le saunoaga lea a Fauono.
“O le faafitauli o pagota, e iai le manatu o loo nonofo i se nofotumau ma e tatau lava la ona tuua i aiga i taimi o aso fiafia, ae galo ai o loo i Tafaigata ona o loo tuli faasalaga o solitulafono na o latou faia ma e lē o iai ni faamanuiaga faapea e maua i taimi uma”.
Faaopoopo Fauono o i latou uma ua filifili mai e tatala i tua o tagata nei e mautinoa e leoleo e usitai i tuutuuga o le palola e pei o le nofo lelei lava i le fale pe a tatala i tua ma e faasā foi ona vaaia i nofoaga faitele aemaise fale faafiafia poo isi vaega e potopoto ai le toatele o tagata.
O lea la sa toe foi i totonu le to‘a 300 na tatala i tua mo le Kerisimasi ae toe iloilo ai e leoleo poo ai e tatala i tua mo aso malolo o le Tausaga Fou.
E toalua foi nisi pagota na sosola ese a o lei oo i aso fiafia ia sa tau saili e oo mai i le taimi o lenei lipoti. E aofia ai i le toalua ia se alii mai i Iva i Savaii ma Vaitele o loo tuli le faasalaga e valu (8) tausaga i le tosoteine. Na sola mai i le vaaiga a leoleo i le taimi na agai ai i le falemai tele i Motootua mo siaki ona ua ma‘i.
