“O le galuega faafaifeau e ola mativa ae faamoemoe i le agaga o le Atua, ma o se galuega foi e tele ona luitau ma faafitauli”. O se tasi lea o finagalo o le susuga i le Toeaina Faatonu le susuga Toese Peleti Toailoa, ina ua fesiligia e tusa ma lona tuua o le galuega faifeau ina ua aulia le 70 o tausaga o lona soifua ua malolo penisione manumalo ai ma le faletua o Senetenari Toese Peleti Toailoa.
O le tusaga e 1984 na amata galulue ai i Sini Ausetalia i le Ekalesia Faapotopotoga Kerisiano i Fairfield i le aai o Sini. O le tausaga na tea nei na atoa ai le 30 tausaga o galulue ai, ma o le tausaga nei i le fono tele i Malua, o le a aloaia ai lona malolo penisione manumalo ma le faletua ia Senetenari.
Faaalia e le Toeaina, o ia tausaga e tele o le la galuega sa lē faigofie ona o le taumafaiga o lana aulotu aemaise o atinae mo le ola lelei o tagata lotu tainane o le lagolago atu i galuega eseese a le ekalesia aoao. “Ioe ua e silafia e lē o se galuega e faigofie pe a oo ina teva finagalo o tagata ona o faafitauli, ae o le tatalo ma faalagolago pea i le musumusuga a le agaga paia, o iinā e ala mai ai le tali a le Atua”.
Sa galulue muamua i le ekalesia EFKS i Satumalufilufi ina ua mae‘a mai aoaoga i le Kolisi Faafaifeau i Malua, ma e sefulutasi tausaga o galulue ai. Na muamua valaauina la te tausia sauniga lotu a le Kolisi o Avele ina ua iu mai Malua i le tausaga e 1968 a o lei galulue i Satumalufilufi. O le tausaga e 1981 na tuua ai lea ekalesia ae o le tausaga e 1982 malaga i fafo ma faamautu ai loa i Ausetalia seia oo ina amata le la galuega fou i le tausaga e 1984.
Masalo e manatua e le aufaitau se tasi o faalavelave na semanu e fano ai ni soifua se tele, le faalavelave i le vaalele tele o le Polenisia na malaga mai Sini Ausetalia mo Samoa i le vaitaimi tonu o le a usu le fonotele i Malua.
O se faalavelave na tulaueleele ai lea vaalele o le Polenisia i se tulaga faanatinati poo le emergency landing ina ua lē mafai ona alu i lalo le tasi o pa‘u o le vaa ona o se alii Tonga na lafi mai ai, ina ua afea e le vaalele le malaevaalele i lea atunuu ma toe faaauau mai ai i Samoa. Sa aofia i le pasese na malaga mai ai le faletua o le Toeaina ia Senetenari lea sa faasaoina lona soifua ma isi tagata uma o le pasese ma le auvaa.
“O le mana faaola o le Atua e mo tagata uma, ma o fua aliali ia o le ola faatuatua ma talitonu e mafaia e le Atua o soo se mea tatou te ole atu ai”.
E pei ona silafia ua lē gata ina telē le sao o le susuga i le toeaina ma le faletua i le faafaileleina o agaga o tagata Samoa o aumau ma alala i Sini Ausetalia, ae ua telē foi le sao o le susuga Toese ma le faletua o Senetenari ma le ekalesia i le tele o faamoemoe saili tupe mai Samoa, e pei o tusigaigoa a nuu ma afioaga aemaise o isi malaga mai Samoa e afea ai le ekalesia EFKS i Fairfield.
O se tasi lea o aulotu EFKS toatele i Sini ma Ausetalia atoa, ma o fua aliali ia o le tele o tausaga o galulue ai le susuga i le Toeaina Faatonu ma le Faletua.
