Ua amata aloaia le Taamilosaga Volipolo o le Northern Zone League i Aukilani e pei ona sa faatumulia ai le malae o taaloga i Otara.
O le Aso Toonai na tea nei lea na tatala aloaia ai ia taaloga e aofia ai ‘au mai Whagarei e oo atu i Tauranga.
O loo tuufaatasi ai i le taamilosaga voli lenei le vaega o ‘au a alii ma tamaitai.
E 17 ‘au a alii ae 16 tamaitai mai vaega uma o Niu Sila e pei ona ta‘ua, ae o loo fefiloi ai soo se ituaiga tagata lava ma soo se tausaga, e faamoemoe o lenei taamilosaga e ono oo atu lava ia Setema lona faagasologa, ona o loo faataamilo le taamilosaga ia taaalo ai ‘au uma lava o loo auai.
O se tasi o ‘au o loo faatumulia i alo ma fanau a Samoa e lelei tele i lea foi taaloga o le voli, o le ‘au lea a North Harbour ma le ‘au a Manukau, ma o le mea lea ua mautinoa ai le talenia tele ma le agavaa o tatou tagata i soo se faagatama.
Ia ona o le taamilosaga e soo se tagata eseese o loo auai ai, o le mafuaaga lea e ese ai foi lona tatalaina, e lē pei o le amataina o taamilosaga taaloga a Samoa e amata lava i tulaga masani aemaise o le faamua i le Atua.
Peitai o le taamilosaga lenei, e na ona oo lava i le taimi na tuupoina e amata ai, alu loa e leai se faatali. O le tele lava o ‘au e tofu lava ma le timetable e faato‘ā faatatau atu lava i le taimi o latou taaloga ona toe tuuvaa foi lea e fai fuafuaga ma faatauga masani o le Aso Toonai, sei vaganā le tagata ua maua foi sia mea e faapasi ai le taimi ma fiafia e maimoa i taaloga voli, ia ona nofo ai lea e tapuai lana ‘au, ae o le mātau a le Samoa Times, o se avanoa lelei tele foi mo aiga e faatafafao ai fanau, a o se lumanai tāua tele foi mo le taaloga Volipolo i le atunuu.
E faaauau pea lea taamilosaga i Aso Toonai seia oo ia Setema.
