O le Tama o le Lava le igoa ua tuuina atu e le afioaga o Leauvaa i le fautasi o le afioaga lea o le a tausinio i le tuuga fautasi lea o le a faatautaia o le Tutoatasi o Samoa i lenei tausaga.
O se igoa ua toe fafagu mai ai le amataga o lenei afioaga ina ua sosola ese mai i le Maugamu i Saleaula i Savaii i le silia i le 100 tausaga talu ai.
Faaalia e le alii Loia na ia amata ona talanoa ma faatino le fautasi mo taulelea o le afioaga, le afioga Tuala Iosefa Ponifasio, o se igoa ua talafeagai mo le fautasi o le afioaga ma o le faapaiaga i lenei vaiaso o lenei taumafaiga na manino ai le tāua tele i le afioaga o lo latou tupuaga aemaise o suiga o le olaga na mafua mai i le maugamu.
O le faamoemoe la na ta‘ua e Ponifasio ina ia avea lea amataga ma auala e unai ai le tupulaga o iai nei o Leauvaa ina ia finauina le manumalo o le tuuga fautasi o lenei tausaga.
E to‘a 43 le auvaa na faamanuia uma ma le sa na faatau mai e le afioaga mai i Manono mo lenei faamoemoe.
Faaalia e Tuala Iosefa (Joe) Ponifasio, o se auala lelei foi lenei mo le atinae o le soifua tauivi ma le sailiili o tupulaga o lo latou afioaga, ina ia iai ni avanoa faapenei e fai sao i ai ma taofi ai le ono oo atu o tupulaga o le afioaga i faafitauli o le olaga ma solitulafono ai.
Na auai atu uma taitai o Leauvaa i lenei faamoemoe auā le faamanuiaga o le taumafaiga a le tupulaga ma ua amata nei la toleniga a le auvaa auā le saili ai o se ‘ai i tuuga fautasi o le faamanatu ai o le 48 o tausaga talu ona tutoatasi Samoa.
O le vaiaso lenei ua tapunia ai ma lesitala ta‘i $300 a soo se fautasi e iai le manaoga ina ia ofi atu i faagatama o le tai mo le Fu‘a.
