Ua amata ona faamata aupega o le Palota e ala i le mau lafoga ma tuua‘iga ua tumu ai polokalame a televise, leitio ma nusipepa i Samoa aemaise foi faaaliga o finagalo saoloto i luga o upega tafailagi. E matautia le ogaoga o tuua‘iga ua alu ma e iai lava popolega i le sopo o faamatalaga lē faamaonia ua agiga solo i luga o fesootaiga televavave.
Ae e foliga mai ua agai lava le tagata latou e unai sui tauva, unai tuua‘iga ma unai le ofi atu i totonu o le Palemene i le paeaiga o loma nei.
O le vaiaso fou le palota tele a le atunuu ae ua mautu mataupu e fitu e iloilo i lenei vaiaso i luma o le Faamasinoga. O talosaga nei na tuu atu i le vaiaso na tea nei. Na amata i talosaga e iva peitai o le Aso Faraile lea na faamautu uma atu ai talosaga ma tali o talosaga, ua toe faaui i tua isi tagi e lua.
O talosaga nei e lua e aofia ai le talosaga a Seuoti Sheryl Fialuma Muagututia faasaga ia Semau Faamau Levi, ae na ta‘ua e le Faamasino Sili le Afioga Patu Tiavaasue Falefatu Sapolu i le Aso Faraile, o lea ua toe faaui i tua ma o le Faafetai foi lea a le afioga Semau Faamau Levi ona o lea ua aveese le talosaga a le tamaitai ia Seuoti Sheryl.
“Ona pau lava le tulaga tāua lea e totoe o le agai loa e sauni mo le faigapalota o loma nei,” o le faamatalaga lea a le tamaitai ia Semau.
O le isi talosaga na faaui i tua i le Aso Faraile, o le talosaga lea a Amituanai Fagaivalu Kenrick faasaga ia Tauala Faulau. Ua ta‘ua e le Faamasinoga, ua lē faataunuuina ona o lea ua toe faaui ese le suafa o Tauala Faulau mai le lisi o sui tauva o le faigapalota.
O isi la talosaga ia e totoe e aofia ai talosaga ua tuuina atu e le Alii Palemia o iai nei, susuga Tuilaepa Lupesoliai Sailele Malielegaoi faasaga ia Tuula Kiliri Lafi Tuitui, o le talosaga ua faia e le Afioga Fiame Naomi Mataafa le Minisita i le taimi lenei o Faamasinoga ma Ofisa o le Faamasinoga faasaga ia Fiaola Iosua Lole, o loo la tauva mai i le nofoa o le itumalo o Lotofaga.
E lē gata i lea o le tagi a le minisita o iai nei o Faamatalaga ma fesootaiga televavave faaonaponei, le afioga Tuisugaletaua Sofara Aveau faasaga i le Sui Komesina o Faigapalota ma le isi sui tauva o Vaimauga i Sisifo ia Fuatimu Mamea Leniu.
O loo iai foi le talosaga a le pulega o Alii ma Faipule o le afioaga o Solosolo faasaga ia Leota Ituau Ale. E lē gata i lea o le talosaga a lē sa Minisita muamua o Tupe, le afioga Faumuina Tiatia Liuga faasaga i le afioga Le Tagaloa Pita Alailima ma Tiatia Mapesone.
O ā lava sauniga ua agai i ai Ofisa faasalalau ma nusipepa i lenei vaitaimi ua lē ‘asa lava ma faamatalaga e faatatau i le palota ma le faamanatu ua ave i le aupalota e faatatau i le sauni atu i le faiga filifiliga tele a le atunuu.
Ua faalua ona faaleaga laupapa faalauiloa a le tasi o sui tauva o le Nofoa tu taulaga a Faleata poo le itumalo tu taulaga i Sisifo. Ua lipotia mai foi nisi o komiti a sui tauva ua agai i fale o aiga o a latou itumalo ua faapea ona faasino i ai numera a a latou sui tauva e tosi i le taimi e fai ai le palota.
E lē o malolo tuua‘iga i polokalame ua faagasolo ai faalauiloa a le Tautua Samoa ae o loo tali mai lava foi le Alii Palemia i ana foi fonotaga ma tusitala i vaiaso taitasi e tali atu ai i tuua‘iga a le Tautua.
O lea ua faalauiloa i se faamatalaga mai i le Ofisa o Faamatalaga a le Malo, e lē o iai ma se aafiaga o le Palemia i le faamautu ai o le a tauva lava i le palota ma le sui o le Tautua Samoa, Tuula Kiliri.
O lea na taumafai Tuula i le palota o le 2011 e tauva peitai e lei mafai ona na faaleaogaina ana taumafaiga i talosaga ona o le tulafono o monotaga.
O lea la ua toe tauva ma ua ave foi e le Palemia i le faamasinoga mo talosaga o le Palota ona o le tulafono lava lea o monotaga.
E ui o lea ae o le faaaliga a le Alii Palemia, o le faailoa ai o le tauva o Tuula Kiliri o faiga nei faatemokarasi. Peitai o le Faasalalauga lava lea na toe faamanatu ai i le atunuu o Tuula Kiliri o le atalii faaletulafono o Toi Aukuso, lea sa minisita muamua ma na faamaonia le moliaga o le fasioti tagata faamoemoeina, faatasi ma Leafa Vitale a o minisita ai ona o le tagatavaleina o le isi foi minisita o le HRPP le afioga Luagalau Levaula Kamu.
Ua folafola le Tautua Samoa e tulai mai loa faalua ona totogi le penisione a tagata matutua ma o le a galulue malosi ina ia faaitiitia le aitalafu a Samoa i atunuu mamao ma o le vaiaso lenei e faatali ai folafolaga a le HRPP latou.
