Ua na o le nofoaga tutotonu o Petesa o loo tapuvae tasi i ai faatasiga a le HRPP o loo molimauina le tumutumu pe a oo ina momoli atu sui faatutū o itumalo e fia lesitala ma tauva mo le fu‘a a lea vaega faaupufai.
E faapena le vaaiga ina ua momoli atu sui tauva o nisi o itumalo e pei o Faasaleleaga Nu.
2, Faasaleleaga Nu 1, Safata, Palauli, ma Faleata i Sasa‘e.
O le finagalo o se tasi o tamalii, o lana vaai i le toatele o sui tauva o le HRPP e foliga mai ai e mamao foi se isi fuainumera o le a manumalo ai i le palota o le tausaga fou 2011.
I le mae‘a ona lesitala le silia i le 40 o sui tauva, na sosoo ai ma le isi faaopoopoga e silia i le 25 sui faatutū.
Na molimauina ai nisi o tamalii sa tauaveina tulaga tofi sinia i nisi o matagaluega a le Malo e pei o Magele Mauiliu, Toleafoa Tautulu Roebeck, ma le toatele o isi sui talavou ua momoli atu e itumalo.
O le alii Palemia le ta‘ita‘i o le vaega faaupufai faatasi ai ma nisi o le komiti faafoe sa auai i le momoliina atu o sui e pei o le afioga Misa Telefoni ma Laauli Leuatea Polataivao Fosi Schmidt.
O le toatele o sui fou o loo iai foi o latou faipule i le vaega faaupufai ma na toe faamamafa ai e le ta‘ita‘i i matai ma sui o nuu ma itumalo na malaga atu le faiga faavae a le HRPP.
O lea faiga faavae o le tāpā muamua lea o se finagalo o le sui faipule pe manao la te o toalua pe sili atu ma isi sui, pe alu toatasi na o ia ae alu faatutoatasi le isi sui tauva.
O le mafuaaga lea na lē mautu ai se finagalo o le komiti mo nisi o sui na faaulu atu, ae ua taatia se‘i feiloai muamua le faafaletui e solaupule lea tulaga.
O le aso 14 o le masina nei o Oketopa sa fuafua e faalauiloa ai sui uma o le HRPP peitai na faaalia e se sui o le komiti e lē o se faipule, e leiloa pe faato‘ā faailoa uma sui i le tausaga fou pe a faataape le Palemene.
“E tele lava nisi galuega o loo fia faia aemaise o le fia screen uma o sui o loo faaulu mai”. Na faaalia foi e lea sui o le komiti, e lē o faigofie i le HRPP ona talia uma sui o loo fia faaulu atu, ona e tatau lava ona mataitu nisi tulaga e ono aliali mai pe a mae‘a le palota ae faigata ona maua se numera e ausia ai le manumalo. “E lē o seetia gofie matou i le lolofi mai o sui tauva auā e iai ma isi o loo Savea tuvaelua”.
O le tapunia o le lesitalaina o tagata palota i le aso 4 o le masina fou o Novema o le a faato‘ā faailoa ai sui tauva o le Tautua Samoa Party lea ua galulue faatasi ma isi vaega faaupufai laiti e pei o le Samoa Party, People’s Party, ma le mafutaga o le faamatai a Samoa o loo taitaia e le afioga Le Tagaloa Pita.
