Faamata ua tatau ona molia le Faipule?

E oo mai i le taimi e lomia ai le tatou lipoti lenei o loo tau saili lava le alii pagota o Iosua Savusa mai Satapuala ma Aufaga i Aleipata lea ua oo atu i le tolu masina talu ona sola ese mai le toese i Tafaigata.

O le sola ese o lenei alii a o taofia ai, ua tele ai faamatalaga ma faitioga ona ua fesootai lea alii ma le alii faipule o le itumalo o loo nonofo ai lona aiga i le afioaga o Satapuala, le Afioga Vaeolenofoafia Tapasu Leung Wai.

Ua laga e faitioga faasaga i le Ofisa o Leoleo se lipoti e faapea na agai leoleo i le maota o le afioga i le alii faipule, ae lei tuua lena e le alii faipule, o le faauluuluga foi lea o le Pulega o Taaloga i Samoa ma le Komiti o Taaloga a le Olimipeka le SASNOC, lo tatou atunuu auā taaloga a Malo o le Taupulega lea faato‘ā toe taliu mai ai le ‘au a le atunuu mai Initia.

O le oo muamua atu lea e pei ona lipotia e le Samoa Observer ina ua fesiligia Leoleo na ta‘ua ai le oo atu i le maota o le alii Faipule o loo iai Vaeolenofoafia ma le alii pagota lea ua au masinā o tau saili e leoleo.

O le faamatalaga a leoleo na lomia i luga o lea nusipepa e faapea, o le a oo atu lava e momoli atu i leoleo le alii pagota sola.

Na toe foi leoleo ae na toe siaki i ai ma maua mulimuli ai, e lē o toe iai le alii pagota ua sola ese foi mai le maota o le alii faipule, ae ua leai foi se alii faipule ona o lea ua malaga i Taaloga e pei ona ta‘ua.

O le foi ma la o le ‘au a Samoa i le vaiaso na tea nei na tāpā ai loa se finagalo o le ofisa o leoleo e faatatau i lea mataupu.

O le mau a leoleo ina ua fono ma tusitala i le vaiaso na tea nei, o le asiasiga muamua lava a Malu o le Malo sa iai le alii faipule peitai e lei iai Savusa.

Ua sui mai i le uluai lipoti lea na lomia faapea o lea sa iai uma le faipule ma le pagota i le maota o le alii faipule.

O le tali a le alii faipule ina ua tāpā e le Samoa Observer lava e faatatau i lenei mataupu na ia tali mai ai faapea, e lei iai se pagota ia te ia.

O le faamatalaga a le Komesina Lagolago o Leoleo, o ia foi o le sui sooupu o le Matagaluega ina ua fesiligia, “sa iai le pagota i le alii faipule, ae e lē o toe iai i le taimi nei.

O loo tau saili e oo mai i le taimi nei ma ua mae‘a foi ona logo le aiga o lea alii ma le tali ua aumai o le a oo mai i le ofisa o leoleo pe a maua e momoli mai ma e oo mai i le taimi nei e lei foi mai lava le solaaga a Savusa”.

O le fesili na tuu atu e le Samoa Times pe faamata e lē tatau ona molia le alii faipule auā o lea ua foi mai i Taaloga, e ui ua tali mai e lē o iai se pagota o nofo ia te ia, ae o lea ua ta‘ua e leoleo “sa iai le pagota”.

E lei manino mai se tali i le fesili ma na toe fesiligia pe lē tatau ona molia i lona faalafi pe faanofo foi i lona fale o se tagata o loo tuliloa e le tulafono.

O le tali a Leaupepe Fatu Pula, “e mafai ona molia ae e lei faananā pe faanofo foi e le alii faipule Savusa i lona fale”.

O le taimi lenei ua toe faalauiloa le ata o lenei alii ma ua faaauau pea suesuega a le ofisa o leoleo ae e lei toe maua atu foi se tala i le aiga o lea alii poo fea o iai Iosua, ae o le ā foi le isi gaioiga o le a faia pe afai e lagalaga pea le mataupu lenei ma aafia ai le alii faipule.