O se vaaiga fou e le masani ai i totonu o Samoa le tulaga ua iai le Ekalesia Asofitu o le Toe Afio Mai i le 6 ai lenei o masina talu ona lolotu le toatele i le Aso Sa, vagana ai se vaega o loo tausia pea lo latou Sapati i le Aso Toonai e pei ona iai le faavae o le Ekalesia Asofitu i le Lalolagi.
I Samoa i le taimi nei ua lua aso tapuai o le Ekalesia Asofitu, ma ua va ai le fogatia e le gata i totonu o Samoa ae faapea foi taitai ma tagata ekalesia i le lalolagi ona o le faaiuga a taitai o loo iai nei o le Ekalesia i Samoa ua suia ai lo latou aso tapuai i le Aso Sa. Peitai a malaga i Niu Sila, Ausetalia, Amerika poo isi vaega o le lalolagi ona foi lea e tapuai i le Aso Toonai.
I se pepa o tusitusiga o loo faaalia ai e le Peresitene o le Ekalesia Asofitu i Samoa, Pastor Uili Solofa e faapea, “O le toatele o taitai o Ekalesia, tagata lotu ma nuu e le o talanoa ma faapea ane ua fiafia o le a o atu le Ekalesia Asofitu e tausi le Aso Sa, ae o le latou gagana o loo gagana ai – O le a tatou o e tausi le Sapati o le Lotu Asofitu. Viia le Atua!”
E le o mafai ona maua se faamaoniga o lenei saunoaga mai taitai o isi ekalesia, aemaise o Ekalesia tetele e pei o le EFKS, Metotisi, Ekalesia Katoliko, Ekalesia Mamona, Assembly of God pe o le tulaga lea ua iai a latou ekalesia i Samoa e pei ona faaalia e Pastor Uili Solofa, o le tausia lea e a latou ekalesia o le Sapati o le Asofitu lea ua lolotu nei i le Aso Sa.
I le taimi nei o loo malosi lapataiga a taitai o le Ekalesia Asofitu i Samoa i ona tagata lotu ina ia usitaia le faaiuga a taitai, peitai ua le o toe mafai ona taofia le faatoateleina o tagata Asofitu ua toe foi nei e tausi le Sapati i le Aso Toonai mai ekalesia e silia ma le sefulu lima i totonu o Samoa ma o loo faatupulaia pea. O se tulaga na molimauina i le Sapati Faapitoa o le Faamanatuina o le 50 Tausaga o Samoa i le Aso Toonai 2 Iuni na faia i le Iunivesite Aoao o Samoa i le Papaigalagala, lea e tusa ma le 400 tagata na auai e aofia ai i latou na asiasi mai Amerika, Ausetalia, Niu Sila, Amerika Samoa ma Dubai.
I lea faatasiga na faaalia ai le faanoanoa tele o le susuga i le Peresitene Malolo ia Pastor Ripine Rimoni sa avea ma failauga faapitoa, i le sese o le suiga ua iai le aso tapuai o tagata Asofitu i Samoa.
O le mau a taitai o loo iai nei o le Ekalesia i Samoa e faapea, ua sui e le Malo o Samoa aso o le vaiaso ma ua fitu i le Aso Sa le faitauga o aso o le vaiaso talu ona suia le taatiaga o Samoa mai le laina faavaomalo i le faaiuga o le 2011.
Peitai o loo faaalia manino e le Peresitene Malolo ia Pastor Ripine Rimoni o loo ua alala nei i Ausetalia e faapea, “E lei suia e se tasi le faasologa o aso a le Atua talu mai le amataga.
E le mafai. E na o le tasi lava foi le Kalena e faitau ai aso a le lalolagi atoa. E lei suia foi e se isi le faasologa o ona aso.”
O loo teena e faifeau Asofitu i Samoa i atunuu i fafo faapea foi le toatele o taitai o le Ekalesia Asofitu i le Lalolagi le suiga ua iai Samoa lea ua tuua‘ia ai le Malo o Samoa ua o latou suia aso o le vaiaso ma faapea mai ai le Peresitene o le Ekalesia Asofitu i Samoa, o lea ua tausia e lotu i Samoa le Sapati o le Asofitu, lea ua lolotu nei i le Aso Sa.
