O le alii pese, afioga ia Tauiliili Petelo Li‘a, e peiseai e fou lona tulai mai i le maketi o musika e pei ona ua amata nei ona faatau ana fatuga matagofie ma ua faafofoga foi i ai i luga o alaleo, peitai o le molimau a le toatele e silafia Petelo poo Peter e pei ona iloa tele ai e ana uo ma paaga, o se alii e fiafia tele i le itu tau musika ma e iai foi nisi faatasiga a le komiuniti i Aukilani ua faafofoga ai tagata i le siufofoga mālie o Tauiliili.
O le molimau a le susuga Petelo: “Ou te fiafia tele e pese ma faalogologo i musika lelei auā e mafai e musika ona ave oe i se nofoaga e te lei oo muamua i ai, e mafai ona siitia oe pe a e vaivai, e faa‘ata oe ina ia e fiafia, ma e mafai foi ona faatagi oe pe a faalogologo mai lou fatu. E tele mafutaga ma faigauō ua iai ona o musika ma e mafai ona faapea atu, e le uma le lisi o aafiaga lelei o musika.”
Saunoa Petelo, e tele upu uigā ma ni feau matagofie o loo iai i nisi pese faaperetania ma o lona faanaunauga i taimi uma lava o le fia faaoo atu lea o nei mea matagofie i ona tagata Samoa.
O le fesoasoani tele lena ia Petelo i le faatulagaina o ana musika, ona e feololo sina ona malamalama i le gagana Samoa ma le faaperetania.
Na te faafetaia ai ona mātua ia Tauiliili Pale ma Palatisa Lia mo le tele o mea sa la faataulagaina ina ia mafai ai ona ia ausia ana moemitiga, e iai lana taleni pese ua amata nei ona tino mai.
Ua silia nei ma le ono masina talu ona galulue Tauiliili ma lana uo, le susuga Eddie Tuala i le tuufaatasia o lana uluai album ua faaigoaina ‘Tauiliili Petelo Lia – mo oe’. O se tulaga masani i le lalolagi o musika o le faalauiloa muamua mai lea o ni nai pese tasi (singles) e tapena ai le au faafofoga mo le album o loo mulimuli mai.
Ma o le aso 17 o Me na faatauina atu ai le uluai single ‘Tamā aua le vave lau savali’. O se faaliliuga o se tasi o pese iloga i le va o se tamā ma sona afafine le ‘Daddy don’t you walk so fast’. Ma o le single lona lua ‘Seven Spanish Angels’ sa tatala i le aso 24 o le masina lava o Me.
O se mea mataina i le single lenei, o le muamua lea ona faatauina e tagata ae lei oo i le aso e faatauina atu ai.
O le single mulimuli na avanoa mo le faatauina atu i le vaiaso na tea nei. Ma e lua pese o loo iai, ‘La‘u pele ea’ ma le pese a le susuga Eddie Tuala o le ‘Help me/Fesoasoani mai’.
E faafetaia ai e Tauiliili le mamalu o le atunuu ona e lei atoa se vaiaso talu ona tatala lenei single ae ua toetoe lava 200 kopi ua faatauina atu i tulimanu uma e fa o Niu Sila.
E mataina foi le tulaga o loo faatino ai le faatauina atu o singles a Tauiliili. E le gata e faatapulaa le aofaiga o kopi ma le taimi e faatau atu ai, ae e lē o faatauina atu foi i se faleoloa. O loo faaaogā fesootaiga vavave faaonaponei, le initaneti i le telefoni ma le facebook, ma ua molimauina le vave tele o nei auala. O loo avanoa foi nei pese mo le maimoa i luga o le Youtube.
I le agaga maualalo e momoli ai le faafetai tele a le afioga Tauiliili iā i latou uma sa lagolago ma oloo lagolagoina pea lenei taumafaiga e ala i le faatauina ma le faalauiloaina o nei pesepesega. O le faamautinoaga a Tauiliili, o mea sili ona lelei ia o loo mulimuli mai i le album ‘Tauiliili Petelo Lia – mo oe’, lea o le a tatalaina i le isi 4 i le 5 vaiaso o lumanai nei.
