O le masina nei o Aukuso o lenei tausaga 2015 ua faamauina i talafaasolopito o Samoa ona ua usuia aloaia ai le fono muamua a le Uluai Ekalesia Faafouina Samoa poo le The first Samoa Revival Church.

Na fanau mai le ekalesia i totonu o le LMS Toe Fuataina lea na solomuli ese uma ekalesia e fitu ma faatu le ekalesia fou ua iai nei, ona o se mataupu sa lē ogatasi ai le futia ma le umele ma se tasi o aulotu a le LMS Toe Fuataina o loo faatuina i Satuimalufilufi.

O aulotu e fitu ua i totonu uma o le Uluai Ekalesia Faafouina Samoa, o loo faamautu i Niu Sila ma Ausetalia, ae o Samoa o loo iai le faamoemoe e faatuina ai se aulotu i se taimi i le lumanai ma le agai atu o le ekalesia i ana fuafuaga faataatitia.

O le faletalimalo o le Vicky’s Motel sa usuia ai le fono muamua i Samoa lea sa auai usugafono na malaga mamao mai i Niu Sila ma Ausetalia.

O se faatasiga mafanafana a usugafono auā sa talanoaina ai atinae ma polokalame o le ola faaleagaga o tagata lotu aemaise o lea ua maimoa usugafono i le fanua ua malilie uma e faatau.

O se eleele e tusa lona telē ma le tasi ma le kuata eka o le a fausia ai se Malumalu ma avea ma nofoaga tutotonu o le ekalesia i Samoa. E silia ma le luaselau afe lona tau ma o se fanua na faatau mai i se tasi o tina faipisinisi ma lona aiga le faletua le afioga Toeipo Eliza Tiavaasue Hunt o loo faafoeina o le ETV, lea o loo lauiloa foi i lona pueina ma tuufaatasia le ata tifaga o le Silamanino.

Na saunoa mai le susuga i le Faifeau Toeaina susuga Faiumu Pio Faletua‘i, o se fiafiaga sili lea i le taitaifono aoao ma le sui taitaifono faapea le laulau o le faauluuluga o le ekalesia ona ua mautu se fanua aemaise o le latalata i le taulaga. O se isi lea o mataupu sa lotea i talanoaga a usugafono.

O le fono tele muamua ua filifilia ai se tamaitai e avea ma Tiakono ma o se sui o le ekalesia mai Melepone i Ausetalia le faletua o Miriama Solofa Te‘o. Na faauu lona tofi Tiakono i le saunia lotu i le Aso Sa na tea nei. O se isi o filifiliga a le fono ua tusi aao ai i le faletua o Koreti Pio Faletua‘i e avea ma Teuoloa poo le teutupe mo le Mafutaga a Tina.

O loo seei le susuga Leafa Faasisila i le taitaifono ae o le susuga Tuimaseve Gasu o le sui taitaifono.

O le Fofoga o le au Toeaina o le susuga Faiumu Pio Faletua‘i, o le Teuoloa a le ekalesia aoao o le susuga Viiga Faamatuainu, ma le Failautusi aoao o le susuga Ausage Mumu Valeni.

O loo iai le fuafuaga o se taimi ona ulufale atu lea o le ekalesia e avea ma sui o le Fono a Ekalesia Soofaatasi i Samoa.

O susuga i faifeau ma o latou faletua faapea sui o le Uluai Ekalesia Faafouina Samoa i le mae‘a o le latou fonotaga tele muamua ua usuia i Samoa