O fesoasoani a le Malo o Saina mo Samoa i le itu i aoaoga ua lē gata ina fausia nisi o faleaoga e faitau miliona o latou tau, ae o lea foi e fesoasoani i le faatupega o aoaoga a nisi o fanau a le atunuu ua maua avanoa sikolasipi i fesoasoani a Saina.
Fai mai le tamaitai Amepasa o lea Malo i totonu o Samoa o Li Yanduan, o le naunautaiga o lona Malo ia lē gata e aoaoina fanau a Samoa i tomai eseese ae o le avanoa foi lea e maua ai le iloa o fanau i tagata o Saina ma a latou tu ma aganuu aemaise o le soifuaga o aso uma.
Faaalia e le tamaitai Amepasa ina ua fesili i ai, o se itu sili tele lea ona tāua ia silafia e fanau a Samoa uiga o tagata o lona atunuu ma ia malamalama i ai. Atonu o se finagalo o le tamaitai o Li Yanduan e mafai ona faaupuina o se auala lelei lea e malamalama ai tagata Samoa i tagata Saina ae o tagata foi o lena atunuu ia malamalama i tagata Samoa.
O le faaafe a le ofisa o le Malo Saina mo alo ma fanau e to‘a 23 ua faamanuiaina i avanoa sikolasipi a Saina sa saunoa ai nisi o alo o le atunuu ua mae‘a mai a latou aoaoga. Sa faamatala e ia sui le tulaga ese foi o Saina ma ana pulega aemaise o le uiga tausaafia o o latou tagata, tainane o a latou tu ma aganuu.
O le fautuaga lava mo fanau o le a tuua aiga ma le atunuu ia taumafai e malamalama lelei i faiga ma pulega o loo faafoe ai aoaoga a le atunuu ma ia fiafia e faamasani i tagata o Saina aemaise fanau a le atunuu o le a latou mafuta i totonu o aoaoga. O se auala sili lea ona latalata ai i le aoaoina o le gagana Saina ma vave malamalama ai.
O le vaiaso nei e pei ona faaalia e le ofisa o sikoilasipi a le Malo o Samoa o le a taunuu i Apia le Amepasa o Samoa i totonu o Saina le afioga Tapusalaia Terry Toomata, mo le feiloai atu i fanau o le a malaga mo aoaoga e ave i ai se upu faamalosiau ma faufautua foi ina ia malamalama ma silafia i tulaga uma o le latou aumau ai i Saina ona o aoaoga.
O le umi o le a aooga ai o le fā i le lima tausaga. O le taimi nei e silia i limasefulu fanau a Samoa o loo aooga i Saina, ma o le a maua ai se isi silafia o fanau e to‘a 23 o le a malaga auā o le a faasoa ane i ai.
O le faafe a le Malo o Saina i Samoa mo ia fanau ma mātua na faia i le afiafi o le Aso Tofi ua mavae lea sa avea ma avanoa e tofi ai fanau i nisi o taumafa faasāina o le a latou feagai i aso uma o le a iai i lea atunuu.
