Unaia pea polokalame mo ni suiga lelei i soifuaga o aiga

O ni afiafi atonu o le a maua ai foi le tele o le ‘ata ma le fiafia, ae o le sini autū o lenei polokalame, le Gladiators of Change, ina ia fesoasoani atu i tamā ma tina poo mātua i ni auala sili ona lelei e faatino ai le tausia a‘e o fanau i tiute faamātua (positive parenting).
O le afiafi o le Aso Lua, aso 14 o Me, o le a faatautaia ai i le Hall a le Kolisi i Otahuhu se polokalame e faapitoa mo tamā poo ulu o aiga ma fanau tama ma soo se alii lava.
E amata le polokalame mai le 6:30pm -9pm. O le afiafi e sosoo ai, Aso Lulu, 15 o Me, o le a faatautaia ai foi le polokalame faapea mo tina poo avā ma latou fanau.
O le a avea ma Fofoga mo nei afiafi uma le susuga i le alii faimeamalie, Tofiga Fepulea‘i mai le Laughing Samoans. E iai nisi o malo faapitoa o le a valaaulia e fai ai foi ni a latou saunoaga i na afiafi uma, ma le faaili mālie o le a faafiafia ai.
E iai foi ni faailoga matagofie o le a maua faafuasei ai i na afiafi. O le a maua fua le sosisi auā sina faamalositino. E valaaulia uma tamā ma alii faapea tinā, tamaitai faapea fanau, ma soo se tasi e afifio atu i na afiafi o le tele o fautuaga, tele metotia eseese o le a fefaasoaai ai auā ni olaga lelei ma le fiafia faaleaiga.
Faamau nei loa i lau kalena le aso 14 & 15 Me, 2013 mo nei afiafi matagofie mo aiga.