“Tuuina atu oe e te nofosala mo le 12 tausaga i le falepuipui”…Faamasino Sili
E lē o telegese ae na o le alu i luga ma saoasaoa solitulafono tau feusuaiga fai faamalosi ua aafia ai fanau teine a le atunuu e faia e o latou tamā. Tasi la lenei faamasinoga sa faagasolo lona suesueina ma aumai i le masina nei o Aperila lona faaiuga.
O le tamaloa o X (taofia lona suafa moni) sa molia i moliaga e lua o le faiaiga faamalosi ma moliaga e lua o le toe faiaiga ma se teineititi e iai ona sootaga faaleaiga. Ua 50 tausaga le matua o X, e toafā lana fanau o teine uma e aofia ai ma le teineitiiti na aafia i lana solitulafono. Ua 16 nei tausaga o lē na aafia ae sa 13 ma 14 tausaga lona matua i le taimi na aafia ai i le solitulafono.
O se taimi o le masina o Iuni o le tausaga e 2009 na amata tupu ai le solitulafono ina ua agai le toalua o lē ua molia ma nisi o le fanau i le faatoaga ae nofo lē na aafia i le fale ma lona tamā ma le tina o lona tina poo le grandmother.
Na ia faatonu ai le teineititi e alu i le potu mo se feau na ia manao i ai, peitai sa ia mulimuli atu i le teineitiiti ma ia faatonu lē na aafia e aveese ona ofu ma ia faatino ai loa le solitulafono e aunoa ma le malie i ai o le teneitiiti.
Na faasolo mai ai lava i le tausaga lea e 2009 e oo mai i le tausaga e 2010 i le masina o Aukuso o loo faatino pea e X le solitulafono. O nisi taimi e tupu ai pe a tuua mai le aoga a le teineitiiti. O le faalapotopotoga o le Toomaga mo e Puapuagatia le Samoa Victim Support Group na ave i ai le teineititi ma nofo i le latou vaavaaiga ina ua iloa le faaletonu, ma logoina ai leoleo mo se suesuega.
Sa tetee X i lona faia o se gaioiga i le teineitiiti, ma o lana tetee lea na faaauau lava ina ua tulai i le faamasinoga. Peitai o se maliega ma loia a leoleo na faaui ai i tua nisi o moliaga o le faiaiga fai faamalosi ae totoe ai moliaga e lua o le faiaiga ma se tasi e iai se sootaga faaleaiga ma moliaga e lua o le faiaiga faamalosi poo le rape.
Sa ioeina e X moliaga ia e lua o le rape peitai ina ua oo atu i le aso o le a lauina ai le faaiuga ae toe faailoa e le loia a lē ua molia, ua sui le tali a X i le teena o ia moliaga ae tumau lava lana ioe i isi moliaga e lua. E lei taliaina e le faamasino sili le afioga ia Patu Tiavaasue Falefatu Sapolu, le talosaga a le loia a X ma tumau ai pea ona faamauina lana ioega i moliaga uma e fā.
Ua faasalina o ia i le 12 tausaga i le falepuipui, ae toesea ai masina sa nofo taofia ai i le vaavaaiga a leoleo a o tālia se faaiuga a le faamasinoga.
