Unaia le toto muamua o tiapula e 5,000 a o lei alu e tau apu

Ua unaia e se tasi o matai o le afioaga o Poutasi Falealili, o ia lea o loo sailia tagata malolosi o le nuu e ave i ai avanoa faigaluega faavaitaimi i Niu Sila, se faiga e faato‘a muamua ai le laueleele o le nuu a o lei malaga se tasi o le afioaga mo ia avanoa. Ua faaalia e le afioga Tuatagaloa Joe Annandale, o loo ia unaia matai o le nuu o loo i le pulega a alii ma faipule e faamalosia taulelea e toto muamua le lima afe tiapula a le tagata ona faatoa mafai lea ona silasila i ai pe agavaa mo galuega faavaitaimi i le polokalame o le RSE.
O se faiga na taua e Tuatagaloa e iloa ai foi le galue malosi o le tagata mo ia avanoa, aemaise o le isi itu o loo silasila i ai, ia malaga le tagata ua iai sona sao mo lona aiga i le tausiga i le itu tau taumafa. O se polokalame e manatu nisi e taua pe a faalautele atu mo isi nuu ma afioaga o loo lolofi le toatele o o latou tupulaga talavou ma le au malolosi o aiga e fia maua ni galuega tau apu, ma isi fualaau aina i faatoaga i Niu Sila, ae o le a faaletonu ai tiute masani i totonu o nuu ma aiga o le atinaeina o le laueleele. E le talia e Tuatagaloa se tasi e fia galue i Niu Sila i lalo o lana faitotoa o loo ia sailia ai tagata mo galuega faavaitaimi, pe afai e lei totoina le lima afe o ana tiapula.
Faaalia le matuā talisapaia e le toatele o aiga o lenei alaalafaga o lenei tau lagalaga a lea foi tamalii o le afioaaga, aua e mautinoa lava o se fuafuaga lelei tele ma e silasila mamao foi i ai, o le a peiseai e atulua ai ni faamanuiaga mo aiga uma o le a utagiaina lenei fautuaga. Aua e le gata ina foi atu le sui o le aiga e malaga mai i galuega faavaitaimi i Niu Sila nei ma sina seleni feoloolo mai se totogi o le a maua, ae mautinoa e foi atu, o loo solosolo lelei pea le faamuli mai a matua poo le ava foi ma le fanau, aua o loo tele le maumaga o loo tua i ai, e pei ona muai tapena ai e tama a o lei tuuvaa mo Niu Sila.