Umusa ma fufui fautasi La o Samoa II

Ua amata ona koleni auvaa o Fautasi e sefulu o le a tauva i le tuuga o le Tutoatasi aua e le o toe iai se taimi, toe o le vaiaso atoa o lumanai ae faataunuu le faamoemoe i le Aso Gafua, o le uluai aso o le masina fou o Iuni. E faapena le auvaa o le Sa fou o le afioaga o Lepea, Le La o Samoa II, lea na umusa ma fufui i le Aso Toonai ua mavae. O se fautasi e ese foi lona fausaga lea ua fai mai le toatele e ono avea ma siamupini o le Tutoatasi. O loo iai le fuafuaga a le Komiti o tuuga fautasi e faia se suiga i le faatinoga o le tuuga o lenei sisigafua i le amata atu lea i Apia i le vaega o loo tini i ai tuuga o tausaga taitasi, ona agai lea i Faleula i le ogasami e masani ona amata ai, toe liliu mai ma tini i Apia. O se fuafuaga e lei mautu i ai se faaiuga pe faatino ona o loo iai popolega ina nei filivaa le tele o Sa i gatai tonu o le ofisa vaaitau i Mulinuu ona e fai si vaapiapi.