Mai i le tele o tausaga sa taumafai ai lava le malo e unai fanau a le atunuu e agai i aoaoga tau faifaatoaga.
E lē toatele fanau a Samoa e iai le manaoga e aoaoina ai i le itu tau i faatoaga e ui o le aoga tau faifaatoaga a le Iunivesite o le Pasefika i Saute o lea e i Alafua i le USP.
O le tele foi o tausaga ua mavae na fai lava ma tau tapuni le aoga tele lea ona o le laitiiti o le numera o fanau a le Pasefika e agai e faatino aoaoga i lea foi tomai. E iai lava foi le manatu faatauvaa i nei aoaoga, ae o le tomai lenei e moomia ai le tomai faasaienisi ina ia mafai ai ona totō ma mulimulitai i fua o faaeleeleaga ma aafiaga i le suiga o le tau i lenei vaitaimi.
O se galuega ua a‘e ai le faatāua a le Malo i le unai e ausia manaoga faavaomalo ia lava taumafa e maua e lea atunuu ma lea atunuu.
Ua tolu nei foi tausaga o totogi e le Matagaluega o Faatoaga ma Faigafaiva i Samoa lava ia sikolasipi e 20 e faatosina ai fanau aoga i Samoa ina ia aoaoina ai i lenei tomai.
Mo kolisi maualuga la i totonu o le atunuu ua iai nisi o aoga ua amata faatoaga ma lafumanu i nisi o lotoā ona o le manatu a amata atu i kolisi lea tomai atonu e toatele fanau a le atunuu o le a agai e faatino tikeri le faasaienisi lea e aofia ai ma faatoaga.
O le kolisi o Avele na faavae mai lava o le aoga o faatoaga mo tama aoga a le Pasefika peitai ua tele tausaga talu ona avea ma kolisi a le Malo e lei toe faia ai lava le mataupu tau faatoaga.
O lea la ua faamalosia le mataupu lenei i vasega uma mai i le Vasega 9 seia oo i le Vasega 13 ma na ta‘ua e le alii pule ua iai nei, Matafeo Lesaesaea Reupena Matafeo, ua iai lafu mamoe, o togalaau faisua, o le sai o meaituaolo ma fualaau ‘aina ina ia mafai ai e fanau aoga ona faatino suesuega aemaise o aoaoga i lenei matata.
O le faaiuga o le tausaga ua iai le fuafuaga a le Kolisi o Avele ina ia fai ai sana faaaliga o nei togalaau aemaise o lafu manu ma ua faaalia le amata lava ona agai atu le fanau e ave nei mataupu.O le tulaga foi lea i le Kolisi o Leifiifi lea ua amata ana taumafaiga i le togalaau faisua ma na ta‘ua e le faiaoga e tele lava ina lē amanaia e le fanau lenei mataupu ae o lea ua lua tausaga talu ona faatino ma ua amata ai foi ona sui le mafaufau o fanau pe a vaavaai i le tele o le galuega e mafai ona maua mai ai e lē gata i le itu tau i suesuega ua toatele tagata Samoa ua maua ai galuega i atunuu eseese o le Pasefika ae o le unaiga o suiga e mafai ona faatino i fua o faaeleeleaga i taimi faigata o suiga o le tau.
O le faamoemoe ina ia toe foi lava Samoa i le numera tasi o lana tupe maua mai i faatoaga ae ua faalautele foi lenei faamoemoe i le malosi ai o le tulaga ua iai lana nofoaga o suesuega lea ua gaosi ai le tele o oloa e pei o le falaoamata, o le ga‘o fai meaai ma isi oloa maua uma mai ona o le tomai faasaienisi i faatoaga ua mafai ona maua e nisi o alii ma tamaitai o Samoa.
O le Kolisi o Sagato Iosefo ua iai ana togalaau faisua ma le lafumoa ma o iina ua agai i ai fanau o lea foi kolisi e faatino ai suesuega o loo fai i le potu aoga.
