O le Lotu a Tamaiti (White Sunday) o le aso lea mo mātua ma le komuniti latou te patipatia ai ma faamanatu le tāua o fanau i le lalolagi, o le aso foi lea ua tuu atoa ai i fanau le faatinoina o sauniga e pei ona masani ai Ekalesia i Aso Sa taitasi.
O le taitaiina o le lotu, e ala i le tatalo, aoina o le taulaga, faatasi ai ma aitema ma molimau, ma ua avea ai i latou ma failauga ae faalogologo mātua ma aiga. O Aso Sa e 2 o Oketopa i tausaga uma o le aso ua filifilia e Ekalesia uma e faatāuaina ai le aso mo fanau.
O le Lotu Tamaiti sa amata mai ai i le tele o tausaga ua mavae, sa faatāuaina ai na o le ofu paepae e fanau, faatasi ai ma le aso ma le masina, ae ua iai le suiga i lenei vaitau, i le tele o Ekalesia. Ua itiiti nai aulotu ua faatāuaina le ofu paepae, ae o le tele lava o aulotu ua pule le tamaititi i lona laei, faapea foi ma aso ua faatinoina ai le Lotu Tamaiti.
O nisi o Lotu Tamaiti ua fai i Aso Sa muamua ma Aso Sa lona tolu ona o loo fetaui ma vaiaso o tuuaga a le fanau ma le aso malolo o le Labour Day, ina ia maua ai se aso malolo mo i latou. E ui lava i lea suiga i nei vaitaimi, ae o loo vaaia lava le tumau o le faatinoina o polokalame taitasi i totonu o Ekalesia.
Ae lē gata i lea, o taimi nei o le tausaga e faitoonai faatasi uma ai aiga ma mātua, ae ua vaai mamao ai le isi tamaitiiti i lona ofu fou ma lona seevae fou, aemaise lava i Samoa auā na o le pau lea o le aso e maua ai lea faamanuiaga ma le icecream ma tele ai meaai. E ui lava ina tatou motu mai ma le taula mai tatou aiga i Samoa ae o loo faaauauina pea e nisi o aiga ma ekalesia lea faatinoga i totonu o aiga ma aulotu.
O vaaiga eseese sa iai le Aso Sa a le fanau i lenei tausaga, ma na maitauina ai le faatāuaina e nisi o Ekalesia e pei o le Metotisi i Onehunga o le solo a le fanau ma laei papae mai luma o le falesa e agai i totonu o le malumalu.
Ae o le Ekalesia PIC Tamaki o loo faifeau ai le toeaina ia Rev Elder Leiite Setefano ma le faletua ia Lealofi Setefano, sa faatumulia lea malumalu i aiga Samoa, Niue ma Rarotonga, na matagofie sauniga a le fanau faapea foi laei papae ma latou pale ua oo lava i mātua, ma o se vaaiga lelei lea i le lagolago o mātua i polokalame a le fanau.
O le Ekalesia Emanuelu Christian Ministries i Papatoetoe na tatala le avanoa e pule ai le tamaitiiti i lona laei e aulelei ai, ae sa faatāuaina le “Faaevageliaina o le lalolagi” e fai ma manatu autu o le aso o le fanau. O ni tapenaga na iloga ona galulue ai mātua ua avea ma faiaoga Aso Sa i le a‘oina o aitema ma matua tauloto faatasi ai ma le fesoasoani a aiga.
E molimau eseese lagona o le aso i le faalogologo a mātua ma aiga, e maua le ‘ata e maua foi le tagi, ae e iai foi ma le lē lava onosai o mātua i fanau ua fiu e faaoleole ae lē faia le tauloto, ae lē gata i lea o nisi o mātua ua lē maua e fanau le Lotu Tamaiti i lenei tausaga ona ua fai i lagi le folauga e faapea foi i mātua.
Na iai ipu faamanatu sa faatāuaina e nisi o Ekalesia mo i latou aemaise lava i le Metotisi ma le EFKS. O loo tumau pea le masina o le Lotu Tamaiti i tausaga uma ae ua eseese Aso Sa i nisi o Ekalesia.
