O se tasi lenei o tofiga tele a le matagaluega e aofia ai aulotu uma a le EFKS sa faataunuuina i le Aso Faraile ma le Aso Toonai 2 ma le aso 3 o Fepuari.
Na usuia i le malumalu o le Puna o le Olataga e fitoi tonu i le susuga i le Toeaina ia Rev Tauaaga ma le faletua ia Senerita Mataafa ma le paia i le Ekalesia EFKS Southwest Brisbane.
O le isi tofiga o le a usuia ia Iulai i le pulega a Perisipeni i Matu. O nisi o mataupu ‘anoa na soalaupuleina pea auā le agai i luma o le galuega e pei ona tuputupu pea ma olaola ua 26 Ekaleisa o le Matagaluega pe a faavae le aulotu fou a Riverview i le aso 23 o Fepuari 2013.
O loo tu pea i matagiolo e avea ma Toeaina Faatonu le susuga ia Rev Kerita Reupena ma le faletua ia Binary Reupena o le Pulega a Sisifo, e 7 aulotu. O le Faifeau Toeaina, ia Rev Tauaaga Mataafa ma le faletua ia Senerita i le Pulega a Perisipeni i Saute e 11 aulotu, ma le Pulega a Perisipeni Matu o le susuga i le Faifeau Toeaina, Rev Lauie ma le faletua ia Autalaga Lupematasila e 8 aulotu.
E tasi le Tiakono Toeaina, o le Matagaluega, susuga Tofua‘iofoia Ofisa Le Mamea ma le faletua ia Apaula. O le tofiga foi lea sa tauaaoina ai le Tusi Resitala o le suafa matai, Tofua‘iofoia ma molimauina e lenei matagaluega. O le suafa matai mai Uafato i Fagaloa.
E iai nisi o mataupu e iloilo i le masina o Mati “O le Iloiloga o Iugafono Tumau”. Ua talia e lenei matagaluega le suiga: “Ia faataga ona ta tatau a tagata o le Ekalesia.” E tuuina atu lenei suiga i le Komiti, sui mai Matagaluega e 16 ma le Laulau o le Fono Tele. O le Komiti lea e faafofoga ma faia faaiuga e tusa o suiga ua fautuaina mai e le
nofo a Matagaluega.
O le Fono Tele e tuuina atu i ai le galuega a le Komiti. O le suiga ua manatu i ai lenei matagaluega, e mafai ona teena pe talia e le Komiti. O le galuega a le Komiti e mafai ona talia pe teena e le Fono Tele. Faatoa maua le tonu i le Fono Tele ia Me.
O le aso 24 Fepuari o le a faataunuuina ai le felaugaiga a A‘oa‘o Fesoasoani ma A‘oa‘o nofoaiga, (i latou ua iu mai i Malua ae e lē o tausia ni aulotu.) E toalua faifeau ua tuuina atu mo le Faauuga i le Fono Tele.
O le faauuga lea e mafai ai ona faia ia Sakalameta a le Ekalesia, Faamanatuga ma le Papatisoga ma ua mafai ai foi ona faia faaipoipoga. O laua ia o Ioane Aloalii ma le faletua ia Silaumua ma le misionare i Alice Springs, Uelese Mulitalo ma le faletua ia Roseta.
Toe tasi le laasaga o tatalo i ai le matagaluega, ia talia e le Komiti Au Toeaina ia tautinoga a sui o Kuiniselani. E silasila le Komiti Au Toeaina i tautinoga a sui mai matagaluega uma i le masina o Mati. A talia galuega tusitusia a latou nei, ona sauni loa lea mo le faauuga.
O faifeau o loo feagai ma malologa e tusa o faiga faavae a le Ekalesia Aoao, Toeaina ia Rev Tauaaga Mataafa ma le faletua ia Senerita, Neti Seluka ma le faletua ia Faauu, ma Perelini Tauilo ma le faletua ia Tiliilagi. O le tofa ia Fata Peteli o le Matauainas Takeaway sa tapenaina le fofoga taumafa i lea afiafi o le Aso Faraile.
O le aao tusitusi o le matagaluega Rev Milo Faaleava o ia sa tapenaina ripoti. Na laulelei ma faamalieina le Matagaluega i le taumafataga mamafa sa saunia e le Uncle Sam’s Takeaway, a Poulava ma Lona Matautia.
Faamanuiaga mai le Matagaluega EFKS ma le leitio i le susuga ia Rev Osa Nanai sa osia le feagaiga o le sakalameta o le faaipoipoga ma lona faletua i Niu Sila, faapea le faletua ia Binary Reupena (faletua o le Toeaina Faatonu) ua tauaaoina lona faailoga Bachelor of Theology.
