Atonu sa mamao ma le mafaufau o le alii 16 tausaga o Sean, o le a iai se suiga faafuasei ae lelei i lona olaga talavou. I le pei lava o uiga o mea nei o talavou, e lē umi ona fiafia i se mea ae sisii lima pe iai le uiga o le fiu gofie pe fiafia puupuu.
Ae ua suia uma lena olaga mo Sean, auā o lea ua tulai mai o se alii talavou ua iai sona tomai faapitoa i se agavaa na te faatino ai se galuega. E faafetaia ai le auaunaga tau a‘oa‘oga a le Future Skills, auā ua ia faaofiina atu i le olaga o lenei alii talavou ma isi foi talavou uma o loo a‘oa‘oina i lenei aoga, nisi o tomai sili ona moomia i aso nei mo le sailia o galuega. O le Future Skills e tele ana mataupu o matata eseese o loo ofoina mai ai avanoa lelei mo fanau talavou. E pei la ona iai le matata tau fau meafale ma le faufale poo isi galuega tetele (Carpentry & Constructions) o loo faatinoina i le isi ona nofoaga i Manukau, lea ua maua ai nei tomai o talavou nei, o Sean Carl ma Juan Ngapera.
Na ta‘ua e Sean i se sui o le Samoa Times, o se isi o lona aiga na faamatalaina ia te ia le aogā o mataupu ia e aoaoina i le Future Skills, ma unaia ai loa o ia e ulufale i lea aoaoga. Fai mai a ia, e lei faapea lava na toe tau faaluafesasi ai ina ua ia tofo ma iloa, e matuā telē se suiga lelei o le a ia maua ai.
O lea ua aoaoina Sean i tomai tau faufale ma isi foi galuega tetele. O le isi itu e sili ona viiviia a Sean, o faiaoga. E telē le aafiaga lelei o faiaoga i le auala ua faigofie ai ona naunau ma fiafia e faagasolo pea ana aoaoga, ona e iai i nei faiaoga le agaga naunau moni e fesoasoani atu ia te ia faapea foi i isi uma tamaiti o loo aooga ai.
Fai mai Sean, e lē na o ana meaaoga foi e fesoasoani atu ai faiaoga, ae soo se mea na te moomia ai le latou fesoasoani, e oo lava i ni toatuga o le olaga masani, e mautinoa lava le nofosauni o nei faiaoga e ofo atu o latou taimi e fesoasoani atu ai.
E faapena foi i le alii 17 tausaga o Juan. O le tausaga talu ai na uma ai ana aoga, ia ae foliga mai ua mae‘a na aoaoga, ae lei iloga ona tino mai poo le ā se mea patino o le a aogā i ai lona olaga. Peitai ina ua faailoa atu foi ia te ia le auaunaga tau aoaoga lea e maua mai le Future Skills, lea foi la ua tofo totino o ia i ai i le suiga lelei lea ua ia maua ai se tomai, e pei foi ona maua e lona uso aoga o Sean.
E 28 vaiaso o le mataupu lea Carpentry and Construction, ma o le mae‘a lelei o lena aoaoga o le a maua ai le tusipasi National Certificate in Building, Construction and Allied Trade Skills level 2.
O le taini nei o lea ua tilotilo Juan i le agai atu e sosoo lana mataupu lava lenei i le Building and Construction – Level 3 i le MIT, ma faasolo atu ai lava ina maua le mautinoa e saili ai loa se galuega auā o lea ua lava saunia le tomai.
E tele isi mataupu eseese e aoaoina i le Future Skills, e pei ona faatulaga ai lalo o le polokalame a le malo mo le fesoasoani atui fanau talavou (Youth Guarantee scheme), lea e aooga fua ai fanau o le 16 ma le 17 tausaga le matutua.
O se polokalame lelei tele lenei ua saunia e le Malo, ina ia mafai ona toe maua se isi avanoa o nai fanau talavou atonu sa faaletonu mai le tulaga o aoaoga masani, ae o lea ua mafai ona lave atu i nei toleniga, auā ni tomai e fesoasoani mo le sailia o ni a latou galuega.
E mautinoa o loo toatele foi isi tama ma teine talavou e pei lava le tulaga o loo iai i le taimi nei, o le mea foi sa iai Sean ma Juan; sa faapea ua faaletonu le olaga ina ua lē taulau manuia aoaoga, ae o le mea moni, o ni talavou o loo fia mananao e iu lelei ma ia aogā mo o latou aiga, pau lava le mea o loo moomia, o se isi e taitaia i latou i le ala sa‘o e toe faaleleia ai lena tulaga o le olaga.
O le sini autū lena ua nofo sauni le Future Skills e faatino mo tama ma teine talavou, o le tuu atu se isi avanoa e te toe tapue ai se tomai patino, e te ono lelei ai, ma maua ai se galuega e tausi ai oe ma lou aiga.
O loo maua pea le avanoa i soo se lala o le Future Skills, pe a susū atu ma saili poo ā a latou mataupu o loo avanoa e ono aoaoina ai oe, ma maua ai sou tomai aogā.
