O le tautua leitio a le Apu FM i le Aso Gafua na tea nei na faatalatalanoaina ai le susuga ia Iosua Tuafuti mai le afioaga o Afega, ona o le fia faalauiloaina o lana ata DVD ua mae‘a pueina mai Samoa ua faaigoaina o le Taulealea Alausu.
Na saunoa Iosua o le la taumafaiga fai faatasi ma le susuga i le tamalii pese ia B.Mack, ae o se toe fia faamanatu o le soifuaga faataulealea na masani ai i Samoa aemaise o le malaga ese mai ma amata faatino le sailigamalo i atunuu ese pei o Niu Sila ma Ausetalia, o le Aso Faraile la na tea nei na amata faatau ai i le Tiana’s Pacific Flavaz i le pitonuu o Broadmeadows faapea ma le Paifalas Joe i le pitonuu o Dandenong aemaise nisi o faleoloa o Initia ma Fiti o faatau i ai le mamalu o le atunuu.
Na saunoa foi le susuga a Iosua o loo faagasolo pea le pueina o le vaega lua ma atonu o le masina o Fepuari e faalauiloa ai. E momoli le agaga faamalo ma le faafetai i lenei tamalii Melepone, ona ua ta‘u ai nei le igoa o le aai i la lea foi faagatama. Sasaa ane e le Atua ona sosia mo lau susuga Iosua ma faalautele lau taleni ma le valaauina.
