E to‘a 14 le aofai o alii ma tamaitai ua faamanuiaina nei i faailoga o le tomai faatausi soifua na faauuina i le faaiuga o le vaiaso. O se sauniga na faatumulia i aiga ma uo aemaise foi le Matagaluega o Tausi Soifua e molimauina le isi laasaga lea o le ola tauivi ma le ola finau o i latou ua filifilia lenei tautua e auauna ai i le atunuu.
O le to‘a 14 o i latou na faauuina o tausi soifua ia ua mae‘a aoaoga faa-Iunivesite ua maua tikeri (Bachelors) o le tausi soifua (Nursing) ma ua mae‘a le tausaga atoa o galulue ai i le auaunaga faatausi soifua i falemai i totonu o le atunuu, o lea la ua mafai ona faamaonia o latou tofiga o tausi soifua ua lesitalaina.
O aiaiga nei ma suiga ua faamautu mo tausi soifua o le atunuu e pei ona iai le manaoga o le malo ina ia maualuga le tomai e maua e i latou ua faamoemoe iai le soifua manuia o le atunuu. O le alii sui Palemia, le afioga Lautafi Selafi Purcell na saunoa i le sauniga e aloaia ai le suiga ua iai le tautua a ia tausi soifua.
O le auaunaga lenei na ia ta‘ua e fai lava ma le alofa ma o lagona nei sa ia faamanatu i le au faauu e tatau lava ona umia e se tagata e agai e tausi soifua o tagata. E faavae ai foi le naunau e fai mea silisili.
O se galuega lenei ua pei lava o auaunaga tetele e pei o leoleo ma faiaoga e lē ‘asa se tausaga ma laga le manaomia pea o tagata latou te faatino auā ua tupu ma ola le atunuu ae ua lē lava i latou e iai lea tomai e tali atu i le toatele o le atunuu e gasegase. Ua maualuga foi tomai ua vaaia le ave i ai o le faatāua ina ia toatele fanau e agai e aoaoina ai ma o le tomai lava faasaienisi lea e tatau ona maua e le fanau i le agai i luga o aoaoga e mafai ona sailiili ma maua ai faailoga tau tausi soifua.
E latalata i le to‘a 300 tausi soifua lesitala o loo ua galulue i Samoa i le taimi lenei ma o se mitamitaga lea i le asosi o tausi soifua i le atunuu lea ua unai pea le faaauau o aoaoga a alii ma tamaitai tausi soifua ina ia ausia tikeri nei.
Ua tele foi tausaga o finau lava lenei asosi i siitaga o totogi o tausi soifua ma o se tasi lenei o Asosi e malosi tele i finauga nei ma o le tali lenei o le latou pitolaau ina ia mafai ona vina i siitaga ae o loo ua maualuga foi le itu tau aoaoga ua maua e tausi soifua.
