Ua mae‘a nei ona filifili le au Kirikiti faavaomalo a Niu Sila le Black Caps mo ana taamilosaga amata o le masina o Iulai.
Ae i le faamanu‘alia ai o le alii Kapeteni o Daniel Vitorry, ua tusi aao ai nei le alii Faiaoga ma le Pulega i le alo o Samoa le susuga a Ross Taylor na te taitaia le ‘au a le atunuu.
O se taimi muamua lea i le talafaasolopito ua kapeteni ai e se alii Pasefika le au Kirikiti faavaomalo a Niu Sila nei, ae o lea ua muamua foi i ai le alii Samoa.
Sa filifili muamua le alii o Taylor e fai ma sui Kapeteni i le taaloga ma Ausetalia i le amataga o le tausaga i Napier, ma mulimuli ane ai ona kapeteniina le au i toe minute o le taaloga lena ina ua lavea le alii o Daniel, a o lea ua faaeaina nei le alii e fai ma Kapeteni, ma o se faaaloalo maualuga lea ua ia mauaina e pei ona faailoa e le alii o Ross.
O le alii o Kyle Mills lea ua sui Kapeteni a o sauni atu le Black Caps ia la taaloga faitaulia ma Sri Lanka i le masina fou.
O le suafa Samoa o le alii Kapeteni fou a Niu Sila i le Kirikiti o Luteru Ross Poutoa Lote Taylor, na soifua mai le aso 8 Mati 1984 i Lower Hutt Ueligitone, ma ua 26 tausaga o lona soifua.
O lona tina o le Samoa a o lona tamā o le palagi Niu Sila ma e fiafia foi le alii e faailoa lona pito Polenisia. Faamalo le finau ma le saili malo i nei foi alo o le atunuu o loo tau atu ai lava le igoa pele o Samoa.
