E lē o se vaiaso faigofie na tea atu nei i le atunuu i Samoa ma lana lakapi, aemaise lava i le Faiaoga ma le Pulega ina ua faiaina le Manu ia Iapani i le Aso Toonai talu ai, ma ua tau lē masani foi le atunuu e talia se faiaina mai i lenei taaloga o le lakapi, talu mai lava le siamupini aoao o le Manu Samoa Taitoafitu i le Lalolagi.
Ia ae o upu masani a le atunuu, a tomua ni mala, ona muliai mai ai lea o ni manuia.
Na maua le avanoa o le Manu e finau ai mo le siamupini o le Taamilosaga Pacific Cup na talimalo ai Samoa, ina ua malo Iapani ia Tonga ae lei maua le aofaiga o ni ‘ai e ono sili ai ia Fiti lea na pito i luga o le faatulagaga talu mai ona amata le taamilosaga.
O le taaloga mulimuli la o le taamilosaga e tusa o le sueina foi lea o le siamupini poo le Final, lea na taaalo ai loa le Manu Samoa ma Fiti, i luma o le faitau afe o le atunuu na molimauina le taaloga i le Apia Park ananafi.
Pau le mea na manaomia e Fiti o le malo tusa lava pe na o le tasi le ‘ai ona suipi loa lea o Fiti ona e lei faiaina lava.
Peitai sa lei tuumāmāina e le Manu le taaloga. E fai si tele o suiga o le ‘au mai le ‘au lea na malolo ia Iapani i le vaiaso talu ai, ua faamuamua taalo le alii o Uale Ma‘i i le numera 9, faapea ona toe fetuunai le laina i luma lea na numera 6 ai le alii o Ofisa Trevaranius, me‘i ane Joe Tekori e loka, ma sui ai ma le paga a Perenise i le alii o Taulafo i le tulaga o le pou.
Ai o nai suiga ia na ese ai le alu lea na alu ai le Manu, ma lē pupula ai le ‘au lapopoa a Fiti.
Na amata tau ‘ai lava Samoa i le sikoa muamua a le alii o Tekori, sosoo ai ma le vili o le ata a le uigi saoasaoa, le alii o Pesamino ma 14 ai Samoa i le leai a Fiti ina ua ova uma kiki a Lolo i le pou.
E ta le ‘afa e na o le 3 ‘ai a Fiti i le sala, ae i le ‘afa mulimuli la lea na toe sui ai le kia ma tope ai le apatā a le Manu ina ua sui atu foi le alii o Alafoti Faosiliva ma maua ana sikoa e lua, ma le sikoa mulimuli i nai minute o le taaloga ina ua fai foi nai mea maneta a le alii o Uale ma David Lemi, ma faō ai le alii o Uale Ma‘i i lalo o le pou.
E lei toe tuua e le Manu se avanoa ia Fiti lea na iu ai lava ina uma le taaloga e lei laasia e Fiti le laina sikoa. E lima lelei sikoa a Samoa ae na o sala na maua ai ‘ai a Fiti.
O ‘ai o le taaloga Manu Samoa 31, Fiti e 9. E ui e tutusa uma Samoa, Fiti ma Iapani e tai tasi faiaina ae lua malo, peitai o sikoa lea ua sola ai le Manu ma le Siamupini o le Taamilosaga Pacific Nations Cup 2010.
Faamalo lau tapuaiga Samoa, ua toe agiagia foi lau Tagavai i taumafaiga a au tamafanau.
Malo le Tau Manu Samoa, ua lē ole lea!
