Ua atofaina le faigapalota a le Malo faa-Setete (State Election) a Vitoria ma le aai o Melepone e faia i le Aso Toonai, 29 o le masina nei o Novema. Ua maitauina i luga o televise, leitio, nusipepa aemaise o upega tafa‘ilagi le saoasaoa o faatosina a vaega faaupufai malolosi e lua e le gata o le Leipa o loo agaia le faigamalo a o le Liperal o loo tutootoo, aemaise foi o le taupati a le tele o vaega faaupufai eseese o taufaaofi nai o latou sa i upufai o le Setete.
Ae ua faailoa mai ai le ofi atu o le suafa o se tamalii Samoa i le tausinioga, o le afioga ia Fuaialii Saolele Anthony Sofe mai le afioaga o Faleaseela.
Ua iloga le tautua a Fuaialii poo le susuga ia Anthony i le atunuu, e le gata o lana tautua i lana ekalesia ma le finagalo o le Atua, ae o lana tautua matavela i le Fono Faufautua mo tagata Samoa i Vitoria, sa ia tauaveina ai le matagaluega mo tupulaga talavou.
O ia foi na taulamua i le galuega soosoo tau‘au ma le matagaluega o leoleo i le laveaiina o alo ma fanau Samoa ua maumau solo (street kids) ma le au faatupu vevesi i nofoaga faitele.
O se tamalii foi e faapelepele i tu ma aga aemaise faafiafiaga faa-Samoa pei ona ia taulamua ma faauluulu i le tele o aso tetele faa-Pasefika e faataunuuina i Melepone.
E talitonu la tatou auaunaga, o le ala foi lea ua a‘e ai sona finagalo e asaina le gasū mo Samoa i upufai. O le itumalo o loo tauva ai le susuga ia Anthony, o Narre Warren South District ua maitauina le toatele o tagata Pasefika o alala ai, e aofia ai ma le mamalu o Samoa. O pitonuu o le itumalo lea e aofia ai Narre Warren South, Hampton Park, se vaega o Berwick ma Lynbrook.
E faatalauula atu ai ma le agaga faaaloalo tele i le paia lasilasi o si o tatou atunuu o nopiai i lea vaega o Melepone, faamolemole ia manatua le tamalii Samoa i lau palota.
O le a nofotatalo ma tapuaia lou alofaiva Fuaialii i le faalagamaea mo upufai, sagai ane ‘ai o le tai ma ia muau ma muliau Ieova i ou ala uma. Manuia le faamoemoe!
