Taumafai mea sili mo le Atua, ae faatalitali i mea silisili mai le Atua
Ua afu lelea le tausaga, ua manunu to’au o ufi, o le faitau lea faaletausaga o ufi, lea la ua oo i le samiga (celebration) o le tautiga o le galue fanua, e faatino i le “faapolopolo”, auā o fua ia e tautalatala i le ma’ema’e ma le maelega o le galue fanua, lea e pei ona iai le uluai faauuga o i latou ua faamanuiaina i lenei tausaga mai le kolisi o le “Ia Malamalama Agape Bible College” i Kalaiesetete, e pei ona faataunuuina i le aso 6 Novema i le maota tapuai a le Ekalesia Faith and Living Ministry.
O le afiafi o le Aso Faraile, aso 4 Novema sa muai ofaga potopoto ai le mamalu o le valaaulia i se taumafataga tele na tapenaina faapitoa e fiafia faatasi ai ma le aufaauu, pei ona gaseseina e tauaiga o le afioga i le faatonu sili mai le laumua, Rev.Dr Peniamina Williams ae faatupeina lava e le kolisi (IMABC).
Na auai i lea afiafi le afioga i le Aoe’e Asi Blakelock ma lana masiofo Letelesa Helen, susuga i toeaina ma o latou faletua aemaise le aufaigaluega a le Atua ma le toatele o le atunuu aemaise uso palagi.
O le fetalaiga Fiu Sefo Tito sa fai ma fofoga (MC) o le afiafi, ona faagasolo lea o polokalame o faafiafiaga a autalavou pei o le Au Uso Kerisiano, AOG mai St Luke, Riccarton, Shirley, matagofie naua tapenaga felanulanuai faapea le pese filifilia a le kolisi.
Suafa o i latou ua faamanuiaina i le Degree: Associate of Arts in Theology
Diana Nilson (Salelologa – AOG Riccarton), Eleitino Vanilau (Tuanai – AOG St Luke), Pstr Faafetai Vaoga (Faiaai Savaii – Au Uso Kerisiano), Faasu Tusa Faaa’efili (Tuanai, Saleilua – AOG St Luke), Mele Tafua (Sapunaoa, Manunu – AOG Shirley) & Karoline Taloolemaagao Afoa (Satalo Falealili – AOG Shirley).
O le tausaga 2009 na uluai faatuina ai le kolisi i totonu o Kalaiesetete, e pei ona faavaeina (founder) e le susuga i le faifeau Rev. Dr Peniamina Williams lea ua galue i Ueligitone.
O le Peresitene o le susuga i le Toeaina Talosia Vanilau (St Luke AOG) faatasi ai ma le pule aoga, Lafaele Kopa, o i latou foi ia o faiaoga faatasi ai ma Pstr Alofa Fonoti ma le lagolago a le faletua Seepa Fonoti.
E lua tausaga e aoga ma finauina ai lenei tikeri ua ausia, o le tausaga muamua lenei o le latou uluai faauuga, ma o se mitamitaga lea i le Kolisi ma faafoi ai le viiga o le Atua.
Na faaalia e le alii pule, e tatala avanoa mo soo se tasi mai soo se ekalesia, ma e lē faatapulaaina foi le tausaga o le soifua.
Peitai o le afiafi o le Aso Sa, aso 6 Novema, sa matuā faatumulia le hall i se sauniga matagofie e pei ona faaulufale mai le solo a le au faauu, o le susuga Alofa & Seepa Fonoti sa fai ma fofoga o le aso, ma uluai amatalia i se sauniga lotu puupuu.
O le peresitene o le kolisi, Toeaina Talosia Vanilau & Rev Peter Hira na saunoa e faaafeiloai le mamalu valaaulia aemaise le au faauu.
O le afioga i le Komesina o Samoa i Ueligitone, Asi James Blakelock na saunoa faalaeiau mo le autū o le aso ma sana faamalosiau e faapea, e lē tāua le tusipasi, afai e lē maua le agaga mai lou tusi ma le Tusi Paia e maimau le taimi.
Na tutulu foi le afioga Komesina a o saunoa faafetai mo Kalaiesetete mo le talimalo faatamalii mo i laua pe a malaga mai, ae o lana saunoaga faamavae foi lea auā ua uma o la tausaga e galulue ai i Niu Sila.
Nisi o saunoaga faapitoa o le aso na fofogaina lea e le susuga i le Toeaina Tumama Vili (EFKS) faapea le tamaitai faipule Leipa Hon Lianne Dalziel, o le faletua Karoline Taloolemaagao Afoa na saunoa faapitoa fai ma sui o le aufaauu.
Na logo faatutuila le aofia i le ‘anoa o le matagofie o le tapenaina o mafaufauga o lenei tina, o ia foi na mauaina le sikolasipi faapitoa lea sa tauaaoina e le susuga Tumama Vili.
Na salani mea uma i se saunoaga lololo ma le suamalie na taualuga i ai mai le pule faatonu o le IMABC (Pres & Founder) i Ausetalia ma Niu Sila, Rev. Dr Peniamina Williams, ma faapea ona ia tuuina atu faailoga mo le aufaauu e toalima taupou ma le toatasi o le manaia.
Na faaiuina manuia le sauniga i le faamanuiaga mai le taitai o le Samoan AOG NZ, Rev Aila’ula’u Faletutulu faapea le tatalo faaiu saunia e Pstr Uasi Tuiloma, ona tuumuli atu lea o le mamalu i malo faaaloalogia, le aufaigaluega ma le aufaauu i le faleaiga ua saunia ai le taumafataga faamavae.
Avatu ai le faamalo ma le faafetai i le aufaauu, Ua faamalo taumafai ma tauivi i mea sili mo le Atua, ae faatalitali i mea silisili mai le Atua.
