E pei ona masani ai le masina o Novema lea ua faapitoa i le kalena a le Ekalesia Metotisi mo faigataulaga o le Me i tausaga taitasi, e pei ona malaga mai ai le afioga i le sea o le faasinoti i Niu Sila i Saute, Rev Sava‘i Loto ma le failautusi susuga Tulasi Ioane.
Ua fai sina suiga laitiiti o polokalama faataatitia o lenei tausaga e tusa ai ma tauaofiaga o le faleono i le motu i Saute.
Sa faapea ona aofai faatasi le faletolu o matagaluega nei o Addington (Rev Neru Tiatia), Halswell (Rev Poasa Leaupepe) ma Ashburton (Rev Leauma Faalafi), ma amatalia ai le latou faigataulaga i le afiafi o le Aso Faraile i le 5pm.
O le susuga lava i le sea ma lana failautusi le ofisa autu, faatasi ai ma le lagolago a susuga i tausi matagaluega o Poasa Leaupepe ma Neru Tiatia i le ofisa o le faigataulaga i lenei tausaga.
Na maua tala fiafia ma le matagofie naua o le faigataulaga e pei ona osia ai i nai aulotu laiti nei ae maini ma malolosi tele, maua foi se lipoti fiafia ia latou pese saunia ae silisili ai le saunia fiafia o loto mo le taulaga osi.
Peitai la o le taeao i le 9.30am i le Aso Toonai sa faataunuuina ai le faigataulaga a le faletolu e iai Invercargill (Rev Masele Tolai), Dunedin (Rev Fiaalii Pese) ma Kalaiesetete (Rev Salafai Mika) lea sa ofaga potopoto ai lupe o le talalelei.
I le mae‘a ai o le fesilafaiga faatamalii ma le ‘ava o le feiloaiga i le taeao pogipogi, ona alo atu lea i le sauniga lotu sa taitaia e le afioga i le sea Rev Salafai Loto, faitauina o le Tusi Paia fofogaina e Poasa Leaupepe ma le tatalo na saunia e Tulasi Ioane.
Na saunoa le taitai i upu taiala e tusa ma le tusi faasino aso a le ekalesia “o lau taulaga e faailoa ai lou faaaloalo i le Atua”, lea na ia fono faapipii ane, ua taoama le paia ma le mamalu o le atunuu e ala i le Talalelei auā ua faavae i le Atua e afua ai le aganuu a Samoa, se tasi o vaega o le faaaloalo, o lau taulaga la e faailoa ai lou faaaloalo i le Atua.
E maeu foi le matagofie o viiga o le Atua sa saunia faapitoa e aufaipese, tiga le to‘agaogao o nai matagaluega mai Invercargill ae na pese malosi, peitai na matuā logo tagitagi le leo mālie o fanau laiti & sikolasipi mai Samoa lea na toatele ai le aufaipese mai Dunedin, faatasi ai ma le tatagi o nota maualuluga a Manumailagi Fetu ma le aufaipese a Kalaiesetete.
Na alo atu le faletolu i le lafoina o le taulaga faasolo i matagaluega taitasi, lea ua uma ona satia ma afifi mo lenei tausaga. Manaia le felanulauai o taga eseese aemaise o le saasaa a le faletua o Fou Mika ma ona foliga tausaafia e lē mālōlō i le faafiafiaina o le faletolu. I le mae‘a ai o le lauina o le aao faitaulaga o le motu i Saute, e ui ina lofituina i kiona ‘aisa ma le aai maluelue o Kalaiesetete, ae o loo vaaia pea le alofa o le Atua, maua se faasiliga o le faiga taulaga i lenei tausaga.
Na ia saunoa faafetai i le loto faitaulaga, tuu laia i le Atua na te faavasega, o Ia foi na te tomatauina, pau lea ia mu le taulaga ua osia faatasi ma ia faamanuia mai le Atua mo lana fanau i mea ua faagaogaoina.
Na tuumuli atu mo le taumafataga faatasi ai ma faaaloaloga mo le sea ma le failautusi faapea le ofisa o le au fai Me na saunia e le faletolu, e pei foi ona laugatasia ai tapenaga a le faleono atoa i le motu i Saute. “Aua nei ia te i matou Ieova e, a ia tuuina atu lou viiga i lau Afio e le aunoa”.
