E lē toe tau faailoaina pe toe auiliiliina le tulai mai o lenei talutalu fou ma ona fatuga, e uigaese foi lona logo malie i le faafofoga. E lē gata o pese i mafutaga, a o le faasolo mafaufauga foi ae lē faatulagaina lava se tasi e fiafia i ai i nei musika.
O loo faagasolo le koniseti lauiloa a le Nifoloa i totonu o Ausetalia, ua mae‘a ona taina faalua i Melepone, a o le po o le Aso Toonai, aso 27 o Novema sa faafiafia ai i Brisbane le susuga ia Maaelopa Polu Paletaoga mai Falelima i le Alataua.
E mautinoa foi o se uluai tama pese lea ua ia tata‘i foi mafaufauga i ni fatuga fou faaonapo nei.
E iai foi le talitonuga o se tasi lenei o alii pese ua ia ausia se seleni maualuga faapea i totonu o Brisbane i le lata i le 5 itula i le po e tasi.
E pei ona silafia ai le suiga fou ua amataina e lenei alo o Samoa, o se tulaga lelei lea ua faamauina foi i le taafaasolopito a le au pepese. O Maaelopa Polu Aso Paletaoga o se alo e faasino i le tina ia Moana ma Aso Paletaoga mai Falelima ma Neiafu i le Alataua.
E ui ina tele le aufaasuaavā, peitai se mea ina a lelei o le eva faatausala na toafilemu ai mea uma ma leai se vevesi. O le alii faasalalau a le Talofa FM mai Samoa, le susuga ia Fonomaitu Puleleiite Vani Tufuga sa fai ma fofoga o le po.
Ua afifi nei e Maaelopa Polu Aso Paletaoga le seleni e tusa ma le 16 afe tala ma ona tupu.
O le faaili lauiloa a le One Sound i Brisbane sa faafiafiaina le po atoa o nisi lava o alo o Masoe ma Evelina mai le alalafaga o Neiafu, faatasi ai ma le vaavaalua a le faaili logomalie mai Melepone, le Mauga o Fao mai Fagaloa susuga ia Junior Lolua Fomai Pio ma le au faaili.
Na maua se avanoa e faafetaia ai e le susuga ia Maaelopa Polu le mamalu o le atunuu sa lagolago i le faamoemoe i luga o le Penina o Asuisui.
O le aso 4 o Tesema o le a faafiafiaina ai le Nifoloa i le aai o Sini i Niu Sa Uelese, ma sauni atu ai e faia lana tataaga mulimuli i Melepone e pei ona toe molimanao mai ai, ma agai atu ai loa i Samoa i le ogatotonu o Tesema.
