Ua atoa le vaiaso talu ona sau i tua le CD numera 2 ua faaigoaina i le Fuesaina Family “O se vai malu”.
O le tulai mai o le CD muamua na matuai maoa‘e le aave o tala i le manaia o le lagiina o pesega e ala i siufofoga o le faafeagiga ma le faletua aemaise le nofoaalo.
O se tasi lenei o faafeagaiga e ese le sogasogā i mea lelei. E lē foi fua lava se mea na te faia, ma e tagi lava i lima ma galue malosi auā taleni mai le Atua.
E 12 pese i totonu o lea CD ma o le tala moni e lē uma le fia faafofoga i le fegaugauaiga o siufofoga aemaise ai le mālū o upu o pese o i totonu o lenei CD.
Mo le silafia o le Susuga i le faafeagaiga e afio mai i le alalafaga o Safune ma le faletua e mai le alalafaga o Safotu i le motu tele i Salafai.
O le tele o pese i totonu o lenei CD o pese faaleagaga e paleni lelei ai siufofoga o i latou uma nei. O le fale puepese lauiloa i Melepone, Fiafia Rekortz sa pueina ai nei CD uma e lua.
O le afioga ia Lupematasila Levae sa pueina sa feagai ma le faamaopoopoina o lenei faamoemoe. Ua iai le faamoemoe e lē o toe mamao se taimi ona amataina lea o se latou MTV.
