O le taeao segisegi, i le mamafa o timuga ae amata ona faalogoina sailigi i vaega uma o le afioaga o Lefagaoalii i le motu tele i Salafai.
O le faaiuga lenei o masina e tele talu ona faatautaia aoaoga ma sauniuniga a le mamalu o le afioaga i auala e mafai ona tali atu ai i le tulai mai ai o se tsunami, o se lologa, mafuie a o se afā fulifao foi.
O le tasi lenei o afioaga i totonu o Samoa e tele lava ina aafia i taimi uma e tulai mai ai faalavelave faalenatura ma ua tele masina o talanoaina e vaega eseese o le nuu ma le Ofisa e vaaia tali o faalavelave faalenatura, auala eseese e tali atu ai i nei faalavelave.
O le feei la o sailigi, o le feoai solo o taavale a leoleo ma le taufetuli a tagata i nofoaga maualuluga o vaaiga ia na amata ai le aso na faatautaia ai faataitaiga ae maimoaina e le ofisa o tali o faalavelave faafuasei ma sui o le Ofisa o le siosioimaga o le Pasefika le SPREP lenei taumafaiga.
E oo i tagata matutua na taumafai uma lava e saili nofoaga maualuluga ina ua amata mai lenei faataitaiga ma na vaaia le tāua o le taimi e tali atu ai ona e pei lava ona vaaia i faalavelave e pei o le sunami e le tele ni minute e va ai le lulu o se mafuie ma le oo mai o galu malolosi i le eleele ma o Lefagaoalii o se nofoaga e tu i le sami le tele o le nuu ma e tāua tele le vave o le gaioi ma le o ese i nofoaga e saogalemu ai le soifua.
O se taumafaiga foi lenei ua faia i isi afioaga o le atunuu aemaise i afioaga e tu lalata i le sami ma e lē o mafai lava ona see i uta le toatele ona o le leai o ni fanua e agai i ai.
E lē gata la i na taimi ma vaavaai lelei le tulaga sa iai le tali a le afioaga ae o se faatasiga na momoli atu ai foi e ofisa nei e lua se fesoasoani mai i le malo o Kanata ma Finland e ala i laei e faia i taimi o nei faalavelave, o ualesi e mafai ona fesootai ai vaega eseese o le nuu aemaise ma isi fesoasoani e tua i ai le afioaga i taimi o faalavelave faapea.
Na faafetaia e sui o le SPREP atoa ai le Ofisa o tali o faalavelave faafusei le DMO le tali mai a Lefagaoalii aemaise o le usitaia o le tele o sauniuniga na fautuaina i taimi o aoaoga.
Na amata mai lava i le fanau laiti seia oo i tamā ma tina matutua sa auai uma i lenei faataitaiga ma e oo lava i le tali a o iai nisi i le sami na aofia uma lava i lenei aoaoga tāua.
O isi afioaga e faaaogā le logo o le falesa, a lē o lea o sailiga ua uma ona faapipii i nofoaga eseese o nuu ae o ualesi ia ua ave ia Lefagaoalii ina ia vave ai a latou fesootaiga ma puipuiga i taimi o ia malaia tetele.
E fai nei faataitaiga o tata mai lava le afā o Tuni ma o timuga ma le lē mafai ona sopoia le Vai o le Maliolio o faailo lava ia na tulai mai i lea aso o le matautia o le tulaga e oo i ai le lamatia o soifua o le afioaga pe afai e lē vave ona tali ma agai ese mai i eleele maualalalo i taimi o afā, tafega ma tsunami.
O lea ua iai le finagalo o le afioaga o le a lē gata ai i aoaoga ua mae‘a ona faatino a latou lava foi taumafaiga e logologopuialii le toatele o loo nonofo i Lefagaoalii ina ia vave le tali atu i le tulai mai ai o faalavelave tetele faapea, aemaise le feagai ai o le atunuu i lenei vaitaimi ma timuga.
