Ua tele polokalame ma ofisa ua tutu faatasi i lenei tausaga auā le faamanatu ai o le 16 o Aso e taofi ai sauaga faasaga i tamaitai. Na amata mai lava i le vaiaso na tea nei ina ua faia le sauniga e faamamalu ai lenei vaitau tāua o faalauiloa ma polokalame e taofi ai le tulai mai o lenei faafitauli tele i Samoa.
O se tasi o Faalapotopotoga ua fesoasoani i le Matagaluega o Tina ma Tamaitai, Atinae o Nuu ma Aga Fesootai, faapea le Matagaluega o Leoleo, le Faalapotopotoga o le Toomaga mo ē Puapuagatia ma Malo Aufaatasi, o le ofisa lea o Aiātatau faaletagata i Samoa.
O se ofisa na faatuina i le tausaga na tea nei e iloilo lelei ai le tulaga o iai manaoga o aiātatau faaletagata e tatau ona faamalosia i Samoa. I sana lipoti lata mai na aofia ai le vaavaai i le tulaga o iai sauaga i totonu o aiga ma o le vaiaso la lenei e talanoaina ai i ni folasaga o lea suesuega faafitauli e mafua ai lava sauaga faasaga i tamaitai.
Faaalia i se faalauiloa o lenei lipoti e le afioga i le Komesina o Sulufaiga, o ia foi o le Faatonu o le ofisa lenei o Maiava Iulai Toma, o nisi o tamā ua faapea mai o i latou e pule i o latou taitoalua ma o le ituaiga mafaufauga lenei ua foliga mai ua faataga ai lava le faia o sauaga faasaga i tamaitai. Ua toatele lava foi ua faaaogā le aganuu faa-Samoa ua unai ai lava le tāua atu o alii nai lo tamaitai i totonu o aiga ma tonu fai o le aiga.
O loo malaga foi i le vaiaso lenei le ofisa o Malo Aufaatasi, le Fono Aoao a Tina faapea ai le Matagaluega o Mataupu tau Tina ma Tamaitai i Savaii i le afioaga o Lalomalava e faatalatalanoa sui e silia i le to‘a 20 o afioaga eseese o Savaii e faatatau lava i aiā tutusa o tamaitai ma alii ma sauaga nei e tetee i ai aemaise o le sao o tamaitai i totonu o upufai o malo poo le Palemene.
O loo unai faatasi lava avanoa tutusa o tamaitai i soo se vaega o le atinae o Samoa ma le taofia o sauaga.
O lea foi e faatino faalauiloa a alii o le Toomaga mo ē Puapuagatia ina ia tulai mai ai alii e taulamua i le taofiga o nei faiga ua faaitiitia ai lava le tulaga o tamaitai i totonu o le atunuu e pei ona taitai ai e nisi ua iloga i taaloga eseese i Samoa ma atunuu mamao ma taitai o nuu lenei faalauiloa. E iai ni maliega ua sainia e pulega o alii ma faipule i Samoa nei ua faamautu ai le tulai mai o afioaga e taofi sauaga faasaga i tamaitai.
O lea foi o loo iai se polokalame ua faatautaia e le Matagaluega a le Malo ua patino i tina ma tamaitai ua tausolomua ai foi alii i le taumafaiga e taofi nei sauaga ua tulai mai pea i le atunuu. O le ofu lanu moli ua faamalosia e Tamaitai o Malo Aufaatasi i ana polokalame e faalauiloa atili ai le toatele o tina ua mafatia ona o sauaga ma ua unai foi galuega faalauiloa i totonu o fale faigaluega ona o le isi nofoaga lea ua matauina le tulai mai ai o sauaga ma faiga faailogatagata faasaga i tamaitai.
Sa folasia ni suesuega a le Matagaluega o Tina ma Tamaitai Atinae o Nuu ma Aga Fesootai, faapea le ofisa o Malo Aufaatasi i le itu tau i galuega, le ILO, ma le matagaluega o Pisinisi, Alamanuia ma Leipa, le MCIL ae ua maua ai e leai ma se fuainumera faamauina e iloa ai le tele o sauaga ma faailogatagata o faia faasaga i tamaitai i fale faigaluega o le atunuu ae o loo iai faamaoniga o le tulai mai o nei faiga.
O le vaiaso lona lua o Tesema e mae‘a ai faalauiloa o le taumafaiga o loo faaauau nei, o le taofia o sauaga faasaga i tamaitai o Samoa.
