Ua tumutumu le atunuu i le faamanatuina o le Tutoatasi, ua toeititi foi toe taape tagata Samoa mai i fafo, ae faaauau galuega masani o le tautua i soo se matafaioi o ofisa o le malo ma pisinisi tumaoti aemaise galuega o le tausiga o aiga ma le atina‘e o faatoaga ma le gataifale.
O le a toe amata ai foi ma polokalame faataatitia i tausaga taitasi e pei ona iai le se‘i o le avanoa e talosaga ai tagata Samoa mo nofomau ma avanoa faigaluega i Niu Sila. O le faailoga o le galulue vavalalata pea o nei malo e lua e pei foi ona toe laga e le taitai o le Malo, le Alii Palemia o Samoa i le faamanatu ai o le tutoatasi o lenei tausaga, lea na ia ta‘ua ai e moni lava i le va galulue faatasi ai o Samoa ma isi atunuu mai i fafo aemaise foi ia Ausetalia, e tau apaapa lava Samoa i lo la va ma Niu Sila, lea na tutoatasi mai ai i lana vaavaaiga faalemalo o Samoa i le 50 tausaga ua mae‘a atu.
O le va lea ua faapea foi ona faamalosia i le maliega poo le feagaiga lea ua ta‘ua o le Quota. O le avanoa lea mo tagata Samoa e pei ona ta‘ua e saili ai lumanai ma avanoa faigaluega i Niu Sila.
O isi atumotu o le Pasefika ua iai foi polokalame ua talosaga ai ae o polokalame ia ua vaaia i isi uma atunuu e fia agai atu i Niu Sila ae na o Samoa lava ua iai le maliega lenei.
O le eseesega o loo iai auala ua faafaigofie ai le talosaga a tagata Samoa. Ua le faia foi i le maualuga o le galuega e tatau ona saili, poo le iai o tomai faapitoa.
Ua tatala lava le avanoa e maua ai soo se avanoa faigaluega – ona pau lava le tulaga tāua ia faamaonia o se galuega moni lea ua maua ma e mafai ona tausi ai se aiga e malaga atu i Samoa nei.
E 1,100 lava avanoa ua maua mo talosaga ae e lē o le numera lea o tagata o loo mafai ona malaga i Niu Sila, o totonu o talosaga nei e 1,100 o loo mafai ona talosaga le aiga atoa i le talosaga e tasi ma o le faitau aofai o tagata Samoa ia na faapea ona faamauina i lona uluai faitauga o lenei tausaga na maua ai e oo atu lava i le va o le 4000-5000 tagata o Samoa ua malaga ese atu mo avanoa nei i lalo o le Quota.
O loo iai foi isi avanoa faigaluega lē tumau ua faagasolo nei ma ua mafai ai e le toatele o tagata Samoa ona malaga faavaitaimi i Niu Sila i le va o le ono (6) masina ma le tausaga atoa e galulue i togalaau ‘aina i vaega eseese o Niu Sila ona toe taliu mai lea ma ua toatele ua fefoia‘i ai i ia galuega faavaitaimi.
O le Aso Faraile o le vaiaso lenei ua faalauiloa nei e le Ofisa o Femalagaaiga a Niu Sila i Apia e faatino ai le se‘i o talosaga ua mae‘a tuu atu i le Ofisa lea o Apia.
O le se‘i lea e sau ai le numera o talosaga ma faapea ai loa ona amata ona faagaioi pepa nofomau o i latou e manuia i le se‘i lea.
O le faagaioiga lea o ia pepa nofomau, pepa faigaluega ma pepa malaga e tatau ona oo atu i le faaiuga o le tausaga ua mae‘a ma ua amata malaga ai le toatele o le atunuu e faamanuiaina.
A le mafai ona ausia e nisi talosaga nei ma le faagaioiga o nofomau, o le a faapea loa ona faamautu le malaga atu i fafo, a leai ua tatala foi le avanoa ia i latou o loo talosaga pea masina faaopoopo i le taimi lenei e nonofo ai i Niu Sila ma e le o sili aso i Niu Sila ae o loo talia pea talosaga mo le nonofo ai i lea atunuu.
O le faamoemoe ina ia mafai ona talosaga atu ai semeamanu o loo i Niu Sila i le taimi lenei.
