Ua fusifusia nei sootaga o Samoa ma le Malo o Amerika i se isi laasaga fou o fesootaiga faavaomalo o atunuu e lua, ina ua sainia se maliega i le va o le Palemia susuga Tuilaepa L Sailele Malielegaoi ma le Amepasa o le Malo Amerika mo Samoa o David Huebner e faamautu i le ofisa o lea Malo i Ueligitone i Niu Sila.
O se maliega ua faamatalaina e le amepasa o le a maua ai e malo e lua se isi laasaga maualuga i le itu i le puipuia malu o tamaoaiga o atunuu mai le saofia i ai o faiga faasolitulafono i le gataifale ma le feaveaiina o laau ma fualaau faasaina.
O se tasi lea o maliega ua osia i le va o le Iunaite Setete ma Samoa sa sainia a o faagasolo polokalame o le limasefulu tausaga o le tutoatasi lea na amata i le Aso Faraile aso muamua o Iuni 2012.
Ua ta‘ua lea maliega o le shiprider agreement na sainia i luga o le vaa leoleo o le gataifale o lea malo o le USS Chafee o le a mafai ai ona maua e leoleo poo le Malu o le Malo ni avanoa e aoaoina ai i luga o vaaleoleo o le gataifale o Amerika poo Coastguard ships i tomai i le puipuia o gataifale mai le soona fagota e vaa o isi atunuu aemaise o le faia o tiute tau i le puipuiga mai le feaveaiina faasolitulafono o fualaau ma vailaau faasaina.
O le a avanoa ai foi ma sui o le matagaluega o faatoaga a le Malo o Samoa e saili tomai mai le puipuia o le atinae o faigafaiva e ala i le auai i le taimi e faia ai galuega a vaaleoleo o le puipuiga o le gataifale a le malo o Amerika.
Faaalia e le Amepasa o Amerika mo Samoa o David Huebner o se tasi lea o fesoasoani a lona Malo ua fuafuaina mo le faailogaina o le limasefulu tausaga o le tutoatasi. O se tasi fesoasoani a lea Malo tele o le lalolagi o le falemai faaitumalo o le a fausia i se taimi o le tausaga nei i se vaega eleele o le malo faafesagai ma le Malaevaalele faavaomalo i Faleolo.
O se falemai o le a tua lelei i ai i taimi o faalavelave faafuasei faalenatura aemaise o le agai ane i ai o le toatele o loo alala i lea faaitu o Upolu i le agai atu lea i Mulifanua seia oo i Falelatai ae o le a latalata foi mo gasegase mai Manono ma Apolima.
O le a aogā tele foi lea falemai mo ni gasegase e fia ave i fafo ae faamautu i ai a o sauni e tuua le malaevaalele i Faleolo mo ni siiga gasegase i Niu Sila poo isi atunuu.
