E pei o le susana i totonu o laau talatala, e pei o moli foi i totonu o laau o le vao, e faapena la‘u uo lo‘u manamea. Ina ua mae‘a le sauniga mamalu na osia ai a la feagaiga ma faapaiaina ai lo la aiga e avea ma tino e tasi, ona afifio faatasi lea o aiga na lua uo ma aumeamamae i le maota mo aso tetele faapenei le La Mirage i Campelfield.
Sa fiafia faatasi ma faamanuia le Aso Tele sa taupoina ma alagaina i talosaga momoli, lenei ua tinipao le uto, ua fesilafai aiga na lua e osiosi aiga ma talamea faasolo mo le lumanai. O le faili logologoā a le Mt Fao na feagai ma le musika faafiafia ma pese faalogologo aemaise o sausaunoaga faa-Samoa a le tamaitai faaipoipo faatasi ai ma le luilui a le valaaulia.
Mataina ma matagofie faafiafiaga a alo ma fanau a aiga na lua, aemaise o faauo a le ulugalii fou. O le tama faaipoipo e mai le afioaga o Malie, o si ona uso ia Auimatagi Vaveao na saunoa e molimau i le soifua o Faausu. O le tamaitai faaipoipo o le alo o le afioga ia Fasavalu Semu Nuuamoa ma le faletua ia Lusia mai afioaga o Samata, Falealili ma Safotu. O ni tamalii ua loa tausaga o tautua mo Melepone i pisinisi tau faleoloa.
O le afioga a Fasavalu na saunoa e talatala le soifua o si o la alo ia Toafa. Sa fai foi le saunoaga matagofie a le tama uosili ma faagasolo ai pea le taliina o le sua a o faafiafia pea le faili ma isi au faafiafia.
Tofusia le aofia i le lufilufiina o le keke ma momoli ai ma faamanuiaga mo le ulugalii fou, ma ta‘ape ai ma le viiga o le Tapaau sili. Manuia lo oulua aiga fou Faausu ma Toafa!
