David Cunliffe.. “Ae oloo matou fuafuaina se lafoga ‘Capital Gains Tax’ e fa’afaigata ai i faipisinisi mai fafo ona fa’atau fale….”
Ua i lalo laitititi ane lava o le selau aso, ona fa’ataunuuina loa lea ole faigapalota a Niu Sila. Ae ole aoauli ananafi sa fa’ataunuuina ai i Magele se feiloaiga a le susuga ia David Cunliffe, le Ta’ita’i ole Vaega fa’aupufai a le Labour Party ma le ‘autusitala (media). Sa auai ai foi i lenei feiloa’iga le afioga ia Su’a William Sio fa’apea nisi o sui ole vaega a le Labour sa latou tapenaina lenei fa’amoemoe.
E tele ni mataupu sa tu’ifesili ai e sui o le TV, nusipepa ma leitio le susuga ia Cunliffe. O se tasi o nei fesili e pei ole foa’i oloo faia i ni tulaga fa’atosina (political donations) aemaise oloo talia lava e sui ole Malo o Niu Sila, e ui e le o talafeagai ma foliga le sa’osa’o auala oloo fa’aui mai ai nei foa’i e pei ona fa’atinoina e tagata faipisinisi maumea oloo malaga mai i atunuu i fafo.
O se tasi o mataupu fa’apea oloo alia’e mai i lenei taimi ma oloo tele ai lava faitioga, ole sitiseni Niu Sila na fa’amatu’u atu ise tasi o alii faipisinisi mai Saina, o Donghua Liu. Ae mulimuli ane, na lipotia mai sa faia se foai tupe e $22,000 e lenei alii ile Pati a le National.
Ma o lenei foi alii faipisinisi sa ave iai e le Malo le avanoa, e na te fa’atupeina ai se galuega toe fa’aleleia e tusa lona tau ma le $70 miliona, na fa’atinoina ile pitonuu o Newmarket, i Aukilani.
Saunoa a Cunliffe, afai ae fa’amaonia se tasi o sui o la latou Pati i ni tu’uaiga fa’apea ole taliaina o ni foa’i fa’atosina, o le a fa’amalolo ese mai loa e tuitui nifo i tua!
Ae o nisi o fesili e fa’atatau ile mataupu o fale po’o apitaga gafatia (affordable accomodation) sa fesiligia ai le susuga ile Ta’ita’i ole Labour, fai mai lana tali :
“O fale poo apitaga gafatia o se tasi lea o a matou fa’amuamua”.
Saunoa Cunliffe ma fa’apea mai afai ae tulai mai le Labour ile faiga palota oloo loma nei, o se tasi o a latou poloketi oloo alo atu iai ole fausiaina lea o ni fale fou, aemaise lava i aai o Aukilani ma Kalaiesetete.
Ua ioeina lava e le susuga ile Ta’ita’i ole Labour, o aai ia oloo pito i sili ona taugata tau o fale fa’atau fa’apea fale mau totogi. E le gata i lea, oloo ua latou fuafuaina foi le fa’atuina o se lafoga, ‘Capital Gains Tax’, e fa’asaina ai i lalo o aiaiga o lenei lafoga ona toe fa’atau atu ni fale i tagata faipisinisi mai fafo, ae ave le fa’amuamua i aiga ‘Kiwi’ (Kiwi families) oloo taumafai ina ia faatau se fale muamua mo le aiga (first home-buyers) e avea foi le lafoga lea ma tulaga e tatau ona maua ai ni fale gafatia le tau, mo i latou oloo sailia ni fale mau totogi.
Ina ua fesiligia Cunliffe poo a ni fuafuaga i tulaga tau fale mo tagata Samoa/Pasefika fa’atoa fou le taunuu mai (new settlers from the Pacific) ma aumau i Niu Sila. Sa ia tali ma fa’apea mai, e tele polokalame faia fua e leai se totogi ae fa’atupe e le Malo (pe afai ae tulai mai le Labour) oloo fuafuaina mo e fou le aumau i Niu Sila, e pei o mataupu mo le a’oa’oina ole Igilisi o se gagana lona lua mo i latou nei ma isi polokalame ole a fa’atinoina i fale faigaluega.
A mae’a loa ona fa’amaonia tulaga masani mo le nofo mau, ole fa’amuamua lava mo i latou nei ole iai o ni galuega mautu e faigaluega ai. O le tasi foi lea o a latou anavatau, ina ia le i luga a’e ole 4 pasene le aofai oi latou e le o iai ni galuega ona e fai lava si maualuga o le pasene o e le o maua ni galuega i lenei taimi.