“La‘u pele e, faauta ua e lalelei, faauta ua lalelei oe, ina tulai ia oe ina sau ia, so‘u faalogo i lou leo, aua o le leo malie”. I le silafaga a le Matai sili oi le lagi ma le molimau a le valaaulia, na o la tutulai ai ma tautino le solo a le tamaloa ia la tautoga o le alofa ua moni ua ulu i tino, i le taitaiga a le susuga i le faafeagaiga ia Bishop Luaiva Aiono, a o faavailolo nisi o le mamalu o le aufaigaluega totofi, ma le paia i aiga na lua ma Samoa na potopoto, na faatumulia ai le malumalu o Narre Warren Stake Centre i le Aso Toonai na tuanai atu.
Se tamaitai Samoa ina a lalelei naua o Jasbernita, o le alo o Tuilavasii Toma Aiono mai Fasitoouta ma le faletua ia Tofiga Tuigamala mai Vailuutai ma Fasitoouta, ae o le alii faaipoipo o Paitai o le ‘afa Rarotoga ma Toga, o ona tuaa o Piiri Turu ma Sineti Turu.
Na mae‘a le sauniga paia, sosoo ma le taumafataga tele i le Hall lava a le Ekalesia a Narre Warren Stake Centre. O le fofoga o le aso na nafa ma le susuga ia Tagoiaega Vilimaa Tuigamala na malaga mai le aai o Sini. O le musika malie na feagai ma DJ Rockmait Trevor Aiono, a o le taumafataga felanulanuai ma le matagofie, na saunia e le Grea8t Catering a le susuga ia Ene ma Tuiga Vaivai, na tali ai le sua a le ofisa fai faaipoipoga ma le mamalu o le Aufaigaluega paia, aemaise o le mamalu o le valaaulia ma Samoa atoa.
Na patipatia ma molimauina le maualuga ma le lava tapena o ausiva eseese sa faafiafiaina lo la aso tele, na maitauina le matagofie o faafiafiaga a le aiga Rarotoga o le tama faaipoipo, faapea ma ona tau aiga Toga, aemaise o le autalavou a le Upper Room ma lo latou sao manaia, ae lē faagaloina le saasaaga faa-Samoa a le tamaitai faaipoipo, faatasi ma nisi o ausiva Samoa.
O le itu na atili maualuga ai le Aso Tele o Jasbernita ma Paitai, ona o valevale alofa ma titi faitama o nai o la aiga, na faaalia i tu ma aga i fanua faa-Samoa, Rarotoga ma Toga, na tatala ai le siapo ma le fala a Toga, le tele o ie felanulanuai a Rarotoga, ma le alofa tulai o le paia lasilasi o aiga na lua faa-Samoa o Jasbernita.
Na matagofie ma maualuga naua foi le aso ona o le faatasi mai o nisi o tauaiga mai Samoa, Niu Sila ma isi setete o Ausetalia. Na faaiuina le aso tele i le tatalo na saunia e Bishop Luaiva Aiono, ma ta‘ape ai le fuamanusina ma le viiga o le Atua. Ia manuia le ulugalii fou, alofagia e le Atua o lua ala uma.
