Ua savali nei i le 4 tausaga talu ona toe lalaga le taamilosaga kirikiti a le Pasefika i Ueligitone, lea o loo i lalo o le faamalumaluga a susuga i faafeagaiga uma o loo galulue i Lower Hutt. E valu ‘au a alii ma le lima ‘au a tamaitai sa auai i lenei taamilosaga.
O ‘au a alii: Valley Boys mai AOG i Naenae, Aute Tausala Ekalesia Aupaia o Aso e Gata Ai mai Lower Hutt, Metotisi Tuufaatasi mai Lower Hutt, Kanana Fou EFKAS mai Wainuiomata, Vaipuna Penetekoso mai Hawkes Valley, Tama o le Meto mai Hataitai i Ueligitone, Vaeluaga o Matagi mai Porirua ma le Lalelei o Tumua mai Porirua.
O ‘au a tamaitai: Valley Girls AOG mai Naenae, Kanana Fou mai Wainuiomata, Aute Tausala Ekalesia Aupaia o Aso e Gata Ai mai Lower Hutt, Vaipuna Penetekoso mai Hawkes Valley ma le Lalelei o Atua mai Porirua.
O le faamoemoe maualuga a susuga i faafeagaiga o loo faafoeina lenei faagatama o le toe lalagaina lava o le taaloga kirikiti ma le toe tuufaatasia o tupulaga o loo aumau i lenei atunuu ma ia maua ai se nofo fealofani o tagata. E tolu aso na faagasolo ai lenei taamilosaga, aso 26, 27 ma le aso 29 na fai ai loa suega siamupini.
O le taamilosaga a alii na sola ai le ‘au a le Lalelei o Tumua ma le Ipu i le la suega siamupini ma le Aute o Tausala, o le Plate na manumalo ai le Tama o le Meto mai Hataitai i Ueligitone, ma le Bowl na sola lea ma le Valley Boys a le AOG mai Naenae.
O le talita na taalo ai Kanana Fou ma le Metotisi Tuufaatasi, ma pepese ai loa le Kanana Fou i le talita i lenei tausaga, a o ‘au a tamaitai na suipi ai le ‘au a le Lalelei o Atua mai Porirua, (2)Kanana Fou (3)Aute Tausala (4)Valley Girls AOG Naenae ma le (5) au a teine Vaipuna.
Na saunoa le susuga i le faafeagaiga ia Faalua Ape Talosaga, o ia o loo faapolokalameina lenei taamilosaga, o se fiafiaga i susuga i faafeagaiga o le avanoa ua maua e tupulaga ma fanau e fesootai ai ma faamasani ai le tasi i le isi. O le tāua foi i le aufaigaluega a le Atua i le latou pito laau i lenei polokalame, e lē na o le pulelaa le latou galuega a o tua foi o le pulelaa e faatalalelei ai tagata uma.
O le komiti faafoe o lenei taamilosaga, o le Taitaifono o Rev Malaki Muaiava EFKAS Wainuiomata, Failautusi Rev Samuelu Tolai o le Metotisi a Wainuiomata ma le Teu Tupe o le susuga i le faafeagaiga ia Faapepele Taituave o le Ekalesia Nasareta a Wainuiomata ma le faafeagaiga ia Faalua Ape Talosaga o le Co-ordinator o le Taamilosaga a le Pasefika.
