Talofa ua goto le fetu o Leapai ma ua tuua le malo e le afioga ia Liutautai Selesa Maiava i le maota gasegase o Logan City i le Aso Lua, 21 o Ianuari, ona ua loa ona feagai ma apulu o tofaga.
O le toesea o le faletua ia Selesa ua o se ao pogisa ua ufitia ai le tamā ia Maiava Aumau Mau ma le nofoaalo faapea aiga faanoanoa, ae talitonu ua mautu le faamoemoe i tua atu o le tuugamau.
O le faletua ia Selesa e mai le alalafaga o Saoluafata ma Falefa ae na faaipoipo atu ia Maiava Aumau Mau mai Satoalepai Savaii.
O le afiafi o le Aso Lulu, 29 o Ianuari 2014 sa faamae‘aina ai sauniga faaleaiga o le toe ulutaia o le atunuu le tina matua poo le afioga ia Liutautai Selesa Maiava. E tuua le malo e le afioga ia Liutautai ua toe 3 masina atoa lona 82 tausaga.
E to‘a13 le nofoaalo toatele ma ua matuai misia e le toetele o fanau, ma fanau a fanau. Na faatumulia lea sauniga tāua sa faia lava i le ekalesia Aso Fitu o le toe afio mai i Logan City sa fafagaina ai le soifua auauna o le tina matua. Sa faisao ai le aufaigaluega totofi a le Atua, Pr Samuelu Afamasaga, Pr Ilalio Salesa, Pr Ietitaia Ah Siu, Pr Tusitina Faiumu, Pr Toetu Faraimo, Pr Lagolago Levae, taitai matagaluega a le SISDAC faapea Pr Tavita Faalelei ma le faafeagaiga ia Misa Luao Matai‘a, susuga i le taitai toeaina ia Lavea Tamala Peni Vaili, Maiava Suimai Tui, Pimoe Seleni Sulusi, Loua Avoka Tagaloa aemaise nisi o toeaiina galulue.
Ua tau lau o le faamoemoe matagofie tapenaga uma o peau faamavae o le tina matua ia Selesa, ae na logo faa-Tutuila le aofia i molimau a le aiga ma fanau, o Selesa o se tina e ala i le Tusi Paia e moe foi i le Tusi Paia, o se tina mafuta i le Atua i le tatalo i taimi uma.
O le tootoo o Tuisamau ia Tuautu Sima Fina‘i sa feagai ma faaaloaloga ae o le afioga ia Pimoe Seleni Sulusi sa fai ma fofoga o le aso.
Sa fai le susuga i le toeaina ia Sai Saufa‘i ma fofoga o Tumua ma Pule e molimolia se agaga faafetai auā palapalamalo ma faaaloaloga matagofie sa tofutofusia ai si gogo ma si ana i‘a.
O le fale‘aiga lauiloa i Brisbane le Uncle Sams Take Aaway sa tapenaina le fofoga taumafa, le tofa ia Poulava Sam ma Lona Matautia.
Ua malolo atu nei le tina matua e faatali ai le aso e afio mai ai Iesu, e ui ina misia le mafutaga ma le tamā, nofoaalo ma aiga faanoanoa.
Upu lava o le Tusi Sa, ‘A o lo‘u oti o lo‘u manuia lea, a o lo‘u ola ua ia Keriso lea. Amuia e ua oti, o e ua oti o i le Alii.
Amuia foi e faanoanoa, auā e faamafanafanaina i latou. Faamaise le agaga o le Atua i le aiga o tagi mai ala.
