Na a‘e se tofa ina ia valaau le ma‘ave loaloa o tama ma teine tuai o Avele o loo alala i Aukilani, ona o le fia togi maa i le faamanatuina o le 90 Tausaga talu ona faavaeina le Laumua i Avele.
Sa auai ai la sui o le ACOBA tuai (Avele College Old Boys Association), o sui o Asosi o tausaga taitasi, o Mafutaga Avele eseese , ma le ma‘ave loaloa o tama ma teine tuai taitoatasi i Aukilani sa fia soosoo tau‘au i le faamoemoe.
O le poloketi ua tapenaina e le komiti faafoe o le 90 Tausaga i Samoa, o le fausiaina lea o se Mini Sports Stadium mo le fanau ia fesoasoani lea i le atiina a‘e lea o tulaga tau taaloga.
O lea fonotaga sa faatuina ai loa ma se lafo ina ia tofia se komiti e faamaopoopoina lenei Mafutaga ma faafoeina le sailiga seleni mo le faamoemoe o le Laumua.
O tofiga la nei:
Peresetene: Vaniah Toloa; Taitaifono: Fata Reupena Faavaoga; Failautusi: Emma Ioka Masoe; Teutupe: Faamoana Vili.
O Iugafono nei:
• Ua tasi nei le Mafutaga o le a faia se Tusigaigoa
• E faia le Tusigaigoa i le aso 29 Mati 2014; o le nofoaga e faia ai o le a se‘i faamautinoa e le komiti ona faailoa lea
O le Aso Toonai i ona tua, aso 8 Fepuari, o le a amata ai se BBQ a le Mafutaga mo le sailiga o tau o le Hall ma isi tulaga faapena.
O loo talosagaina e le laulau a le komiti, le mamalu o tama ma teine tuai uma i Aukilani o ē e lei mauaina se tala i lenei fuafuaga, ina ia afifio mai tatou faifai mea faatasi.
Atonu o se avanoa lelei lenei o le a fai ai se sao ma toe faafoi atu se meaalofa a i latou uma sa aotauina i lenei kolisi iloga a Samoa, mo le Laumua i Avele sa pele ia i latou uma a o aooga ai.
