Ua valusefulu pasene le tulaga maluelue o le lagolago a le tofa Lealailepule Rimoni Aiafi, i le vaega faaupufai o le Tautua Samoa, ma o se ata manino o le suia o se vaega faaupufai e tauva ai i le palota tele a le atunuu i le tausaga fou 2016.
Na maua se avanoa e fesiligia ai le faipule o Faleata i Sisifo, i le afiafi o le Aso Sa na tea nei ina ua fesootai atu i ai i lana telefoni feaveai. Na tuusa‘o le fesili ona o le fia maua pea o sona finagalo mautu ua iai e ui ua agiga se lipoti muamua ua iai sona lagona o le a see ese ma le vaega faaupufai o loo ia lagolagoina i le taimi nei, ae see e lagolago le HRPP i le faigapalota o le tausaga fou.
“E lei mautu lava sa‘u faaiuga ae o le a ou faailoa i se tulaga aloaia la‘u faaiuga pe a mae‘a ona faata‘ape le Palemene i le amataga o le tausaga a sau”, o le finagalo lea o Lealailepule.
Na mafua ona toe tuliloa le alii faipule ona o sana saunoaga i le faaeeina o lona suafa Tupuola o Vaitele o loo matai ai foi i le suafa Lealailepule. Sa ia faailoa ai lona aga atu e lagolago se itu o le a avea ma faigamalo fou.
O le faafotu tupu o le alii faipule ma nisi o suli o lona aiga sa faaee ai foi ma le suafa Galumalemana i le alii Palemia susuga Tuilaepa Lupesoliai Sailele Malielegaoi. Na alala faatasi Lealailepule ma le taitai o le Malo ma sa molimau le toatele na auai.
E tasi le faaiuga na oo i ai manatu o tagata, o lea ua moni faamatalaga salalau ma lipoti ua alu o le a see atu le faipule o Faleata i Sisifo e lagolago le HRPP. Peitai na faaalia e Lealailepule e lē mafai ona aveesea lona loto ma le Tautua Samoa ona o ia o se tasi o sui faavae na galue faatasi ma isi sui o le vaega faaupufai e faatu.
“Ioe o se lagona lena ia te au ae malie lou finagalo o le a faatoa ou faailoa vaega uma ma e logo atu foi lau susuga pe a oo i le taimi ua talafeagai lelei ma le faia o lena tulaga”. O aiaiga o tulafono tumau a le Palemene o loo iai nei, e lē mafai e se faipule ua mae‘a ona lesitala i se vaega faaupufai ona toe suia se isi itu e lagolago i ai i le taimi atoa o le paeaiga a se Palemene na filifilia ai e avea ma faipule o lona itumalo.
Pe afai e tupu se tulaga faapea o le a otometi lava le avanoa loa o le nofoa ae toe foi e faia le palota laitiiti e sailia ai le finagalo o le itumalo. O le tulaga faigata lea i le taimi nei mo le faipule o Faleata i Sisifo ona o loo lesitala o se faipule o le Tautua Samoa o loo agaia nei le faigamalo a le HRPP.
E pei ona silafia na faia‘ina Lealailepule i le palota laitiiti na faia a lona itumalo ina ua faalēaogaina lona filifilia ma avanoa ai le tofi o le itumalo i le paeaiga a le Palemene o le 2006 i le 2011. Na mafua le faaiuga a le Fofoga Fetalai o lena vaitau ona ua faailoa e Lealailepule ma nisi o faipule sa tutu toatasi poo independent MPs, lo latou auai i se pati faaupufai na latou faatuina. Na toe pale mai i le palota tele o le 2011 e oo mai i le taimi nei.
