O le pepe Samoa le teineitiiti o Alofamoni Lagi, o se pepe lenei o le a tusia i le talafaasolopito i totonu o Sini i Ausetalia, o se uluai pepe ua fanau i totonu o se nofoaga e faatali ai nofoaafi (train station).
O le fafine o Cecelia, na lē au i le falemai e pei ona taumafai atu i ai, ma iu ai ina fanau loa i le nofoaga faatali nofoaafi i Auburn i le itu i Sisifo i Sini i le aso 29 o Setema 2015.
I ni tusitusiga i luga o upega tafailagi o loo ta‘ua ai e le alii sa taitaia le tiute i lena aso i le nofoaga o nofoaafi i Sini (Trains customer service duty manager) susuga Matthew Ward, e faatoa ono nei masina talu ona faigaluega ai i lana galuega lenei, ae o lea ua faafuasei ona ia faia lea galuega o le faafanauina o se pepe fou ua fanau mai, ae i lenei nofoaga e lē masani ai, o le nofoaga e faatali ai nofoaafi.
O le susuga Ward, faatasi ai ma le tamaitai o Jennifer Thompson, o i laua sa fesoasoani e faatonutonuina Cecelia i le tau amataga o le fanauga, seia oo ina ua taunuu ane le vaega a le falemai ma faamae‘a ai loa ona tuueseeseina ma le saogalemu le tina ma lana pepe i totonu o le ofisa o le nofoaga o nofoaafi.
O le atoa o le tolu vaiaso o le matua o le pepe o Alofamoni Lagi, na toe foi ai le tina o Cecelia ma si ana tama pepe, i le nofoaga o nofoaafi i Auburn e molimoli le la faafetai tele i le vaega o le aufaigaluega a le Sydney Trains, ona o le galuega vave ma le mae‘ae‘a sa latou faia ua faasaoina mai ai o la ola o ia ma si ana pepe.
Sa matuā atamai gaioiga uma na faia e le alii ofisa o lea nofoaga; ina ua vaaia e Ward le tulaga mafatia o le tina ia Cecelia, sa ia ave le tina ma‘itaga i totonu o le staff office ma taumafai e faataoto i lalo a o ia vili vave le taavale a le falemai.
Na faatonutonu mai e se tasi i le telefoni mea uma e fai a o faatali ai le taunuu ane o le taavale a le falemai i le 15 minute mulimuli ane. Sa matuā viiviia e le Minisita o Felauaiga ma Galuega Tetele a Niu Sa Uelese (NSW Minister for Transport and Infrastructure) susuga Andrew Constance lana aufaigaluega aemaise lava le susuga Ward mo le vave ma le atamai o le latou auaunaga sa faatino aemaise o le vave o le mafaufau i le gaioiga tatau e ao ona fai. Sa faaleo foi le agaga faafetai o le tina ia Cecelia i le aufaigaluega a le Sydney Trains ona o le galuega alofa sa latou faatino mo ia ma si ana pepe.
Ma na ia ta‘ua o le ala tonu foi lea ua ia faaigoa ai lana pepe o Alofamoni ona o le galuega alofa sa faia e nei tagata ia te ia i le taimi na sili ai ona ia manaomia se fesoasoani, o le mea tonu lea e ta‘u o le alofamoni.
O le fautuaga a le susuga Ward i soo se isi lava tagata faigaluega poo ai lava, ae te‘i ua fetaiai ma se tulaga faapea, “ia e faia se gaioiga silisili e te mafaia i ni mea o loo mafai ona e maua i lena taimi e faatino lau gaioiga.”
“Taumafai ia mafai ona e faatoafilemu o latou faalogona, ma e tatalo ia vave ona taunuu atu le vaega a le falemai.”
